जामखेडची 'ऑक्‍सिजन' लेव्हल घटली; 425 रुग्णांच्या नातेवाईकांची वाडली धाकधूक

जामखेड (अहमदनगर) : तालुक्‍यात कोरोना रुग्णांकरिता लागणाऱ्या "प्राणवायू"चा तुटवडा निर्माण झाला आहे. जामखेडला दररोज 200 ऑक्‍सिजन सिलिंडरची गरज आहे. प्रत्यक्षात मात्र 90 ते 100 सिलिंडरच मिळत आहेत. त्यामुळे रुग्णांना ऑक्‍सिजन पुरवठा कसा करायचा, असा प्रश्‍न ऐरणीवर आल्याने कोविड सेंटरचालकच "ऑक्‍सिजन'वर आहेत.

नगर जिल्ह्यात पाच ऑक्‍सिजन प्लान्ट असून, त्यापैकी तीन नगर एमआयडीसी येथे आहेत. त्यातील दोन प्लान्टद्वारे जिल्हा ग्रामीण रुग्णालय व विळद घाटातील हॉस्पिटलला ऑक्‍सिजन पुरवठा केला जातो. केवळ एका प्लान्टद्वारे जिल्ह्याभरात ऑक्‍सिजन पुरवठा होतो. संगमनेर व नेवासे येथील दोन प्लॉंट तेथील गरज भागवून इतर तालुक्‍यांची ऑक्‍सिजन गरज भागवतात. मात्र दक्षिणेतील बहुतांशी तालुके एमआयडीसीतील प्लॅंटवर अवलंबून आहेत. त्यामुळे मागणी प्रमाणे सिलिंडरचा पुरवठा होत नाही.

जामखेड तालुक्‍याला सिलिंडर पुरवठा करणाऱ्या तीन एजन्सीज आहेत. जामखेडला शासन-संस्था व लोकसहभागातून एक, तर तीन खासगी कोविड सेंटर आहेत. या चारही कोविड सेंटर मिळून 190 ऑक्‍सिजन बेड आहेत. तेथे 425 हून अधिक रुग्ण उपचार घेत आहेत. जामखेडला दररोज 200 ऑक्‍सिजन सिलिंडरची गरज आहे. मात्र 90 ते 100 सिलिंडरचाच पुरवठा होत आहे. त्यामुळे उपचार घेणाऱ्या रुग्णांची संख्या पाहता सिलिंडरच्या पुरवठ्यात मोठी तफावत आहे. यासंदर्भात वेळीच दक्षता घेतली नाही, तर मोठ्या संकटाचा सामना करावा लागण्याची शक्‍यता व्यक्त होत आहे.

बंदीमुळे पेच

बीड, उस्मानाबाद, जालना, बारामती येथील प्लॅंटवरून जामखेडला ऑक्‍सिजन सिलिंडर मिळत होते. मात्र तेथील जिल्हाधिकाऱ्यांनी तेथील ऑक्‍सिजन सिलिंडर स्थानिक कोविड सेंटरला पुरवावेत, असे निर्देश दिले आहेत. त्यामुळे जामखेडकरांची संपूर्ण भिस्त नगर एमआयडीसीतील प्लॅंटवर अवलंबून आहे. दरम्यान, आमदार रोहित पवार यांच्या सहकार्यामुळे बीड येथील प्लॅंटमधून जामखेडच्या सीआरएचपीच्या कोविड सेंटरकरिता दररोज 50 सिलिंडर दिली जातात, हा केवळ अपवाद आहे.