Video : अकोले तालुक्यात पावसाचा जोर कायम; ‘या’ धरणात ऐवढा पाणीसाठा

शांताराम काळे
Wednesday, 12 August 2020

कोथळे, बलठन, टिटवी लघुपाटबंधारे पाण्याने भरले तर भंडारदरा धरणाने ७० टक्के पार केले आहेत.

अकोले (अहमदनगर) : कोथळे, बलठन, टिटवी लघुपाटबंधारे पाण्याने भरले तर भंडारदरा धरणाने ७० टक्के पार केले आहेत. येथे अजूनही पाऊस सुरू असून घाटघर येथे पाच इंच तर रतनवाडी येथे चार इंच पावसाची नोंद झाल्याने भंडारदरा जलाशयात पाण्याची आवक वेगाने होत आहे.

जलाशयात २६९ दशलक्ष घनफूट पाण्याची आवक झाल्याने ७७१७ दशलक्ष घनफूट पाणीसाठा आहे. त्यामुळे ७० टक्के जलाशय भरले आहे. वाकी जलाशयात ११२. ६६ दशलक्ष घनफूट पाणीसाठा असून ७८९ क्यूसेसने विसर्ग सुरु आहे. त्यामुळे कृष्णवंती वाहत असून रंधा धबधबा अवतीर्ण होऊन निळवंडे जलाशयात पाण्याची आवक ६४ दशलक्ष घनफूट झाली. ४९०९ दशलक्ष घनफूट पाणीसाठा उपलब्ध आहे. ५८. ८४ टक्के जलाशय भरले आहे. तर मुळा नदीतून २६३५ क्युसेक्सने प्रवाह सुरु आहे.

तालुक्यातील आंबित १९३, देव हंडी १५५, पिंपळगाव खांड ६००, वाकी ११२ हे जलाशय भरले आहे. दोन दिवसापूर्वी कोथळे १८२ दशलक्ष घनफूट, टिटवी ३०३ दशलक्ष घनफूट व बलठण २०२ दशलक्ष घनफूट क्षमतेचे लघु पाटबंधारे प्रकल्प भरले आहेत,  अशी माहिती जलसंपदाचे अभिजित देशमुख यांनी दिली आहे. 

कुमशेत येथील नऊ बंधारेही भरून वाहू लागले आहेत. त्यामुळे मुळा व भंडारदरा पाणलोट क्षेत्रात अधिक वेगाने शेतीची कामे सुरु आहे. जनावरांनाही मुबलक चारा उपलब्ध झाला आहे. भंडारदरा व निळवंडे जलाशयात पाण्याची आवक सुरु झाल्याने लाभ क्षेत्रातील शेतकरी खुश आहेत. निसर्गाचा आस्वाद घेण्यासाठी मात्र कोरोनाची वक्रदृष्टी असल्याने पाटबंधारे, वनविभाग व पोलिस, महसूल, स्थानिक प्रशासन पर्यटक येऊ नये म्हणून दक्ष आहेत. त्यामुळे धबधबे व जलाशयावर गर्दी दिसत नाही.

संपादन : अशोक मुरुमकर


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Kothale Balthan Titvi Irrigation in Akole taluka filled up