बालिकाश्रम रस्ता परिसरातही एलईडी

अहमदनगर : शालेय विद्यार्थी, शिकवणीवर्ग, महाविद्यालये, असा गजबजलेला भाग असलेल्या बालिकाश्रम रस्ता परिसरात गेल्या अनेक दिवसांपासून पथदिव्यांचा प्रश्न निर्माण झाला होता. याबाबत नुकतेच महापौर रोहिणी शेंडगे यांना निवेदन देण्यात आले. त्यानंतर तातडीने महापालिका प्रशासनाने स्मार्ट एलईडी दिवे बसविण्याचे काम सुरू केले आहे. प्रभागाचा विकास हाच अजेंडा असल्याची माहिती महापालिकेच्या महिला बालकल्याण समितीच्या सभापती पुष्पा बोरुडे यांनी दिली.

बालिकाश्रम रस्ता परिसरामध्ये मनपाच्या वतीने स्मार्ट एलईडी पथदिवे बसवण्याच्या कामाची पाहणी मनपा महिला बालकल्याण समितीच्या सभापती पुष्पा बोरुडे यांनी केली. सभापती बोरुडे म्हणाल्या, की हा नगर शहराचा मुख्य भाग आहे. मोठ्या प्रमाणात नागरी वसाहती निर्माण झाल्या असून, दाट लोकवस्ती आहे. या भागातून मोठी रहदारी व वाहतूक होते.

शालेय विद्यार्थ्यांचे शिकवणीवर्ग, वसतिगृह व महाविद्यालय या भागामध्ये आहे. या परिसरामध्ये अनेक दिवसांपासून पथदिवे बंद होते. त्यामुळे नागरिकांना अंधाराला सामोरे जावे लागत होते. त्यामुळे नागरिकांच्या विविध समस्या निर्माण झाल्या होत्या. महापौर शेंडगे यांच्याकडे पथदिवे बसविण्याची मागणी केल्यानंतर मनपाच्या वतीने आज तातडीने स्मार्ट एलईडी पथदिवे बसविण्याच्या कामाला सुरवात झाली आहे. प्रभागातील इतर कॉलनींमधील पथदिवे बसविण्याच्या कामाला सुरवात होऊन संपूर्ण प्रभाग लवकरच प्रकाशमय होणार आहे.