श्रीरामपूर ते थेट तामिळनाडू! 'तो' मुलगा अखेर सापडला

श्रीरामपूर (जि.अहमदनगर) : तब्बल दीड वर्षापुर्वी तालुक्यातील एका गावातून बेपत्ता झालेला १२ वर्षीय मुलगा अखेर वेल्लुपुरम (तामिळनाडु) येथे नुकताच सापडला आहे. त्याला अज्ञात व्यक्तीने अज्ञात कारणासाठी पळवुन नेल्याप्रकरणी तालुका पोलिस ठाण्यात ६ फेब्रुवारी २०२० रोजी गुन्हा दाखल झाला होता. या गुन्ह्याचा तपास सुमारे दीड वर्ष तालुका पोलिसांकडुन न लागल्याने पुढील तपास अनैतिक मानवी वाहतुक प्रतिबंध कक्ष यांच्याकडे सोपविला होता. त्यानंतर अनैतिक मानवी वाहतुक प्रतिबंध कक्षाचे पोलिस हवालदार एस. बी. कांबळे यांनी त्याचा शोध घेतला.

दीड वर्षापुर्वी हरवलेला मुलगा तामिळनाडुमध्ये सापडला

तपासादरम्यान, पोलीस निरीक्षक मसुद खान यांच्या सुचनेप्रमाणे राज्यातील विविध बालसुधारगृहे, सामजिक संस्था (NGO) यांच्याशी संपर्क साधुन पाठपुरावा केला. तसेच देशभरातील बाल कल्याण समिती व सामजिक संस्थांशी संपर्क साधण्याची विनंती केली. सदर बालकाबाबत वेळोवेळी नगर येथील बाल कल्याण समितीनी माहिती घेतली. तेव्हा बेपत्ता असलेला मुलगा वेल्लुपुरम (तामिळनाडु) येथील बाल कल्याण समिती मध्ये असल्याचे समोर आले. हा मुलगा बाल कल्याण समिती वेल्लुपुरम (तामिळनाडु) यांना मिळाल्याने त्यांनी त्याला नगर येथील बाल कल्याण समितीकडे नुकताच सुपूर्त केले. त्यानंतर अनैतिक मानवी वाहतुक प्रतिबंध कक्ष (AHTU) यांनी बाल कल्याण समितीकडुन योग्य त्या पुर्ततेसह ताब्यात घेवुन पुढील तपास तालुका पोलिस ठाण्यात पुन्हा वर्ग केला.

अनैतिक मानवी वाहतुक प्रतिबंध कक्ष व बालकल्याण समितीची कारवाई

ही कारवाई जिल्हा पोलिस अधीक्षक मनोज पाटील, अपर पोलीस अधिक्षक सौरभ अग्रवाल यांच्या सुचना व मार्गदर्शनाखाली पोलीस निरीक्षक मसुद खान व अनैतिक मानवी वाहतुक प्रतिबंध कक्ष तसेच बाल कल्याण समितीने केली आहे.