MP Sujay Vikhe Patil : देशात लव्ह जिहाद विरोधी कायदा हवा; डॉ. सुजय विखे पाटील 

राहुरी : देशात लव्ह जिहाद विरोधी कायदा करणे काळाची गरज आहे. संसदेच्या चालू पावसाळी अधिवेशनात बोलण्याची संधी मिळाली, तर लव्ह जिहाद विरोधी कायद्याविषयी निवेदन करणार आहे, असे खासदार डॉ. सुजय विखे यांनी पत्रकारांशी सांगितले.

राहुरी येथे आज (शनिवारी) हिंदू सकल समाजातर्फे आयोजित हिंदू जन आक्रोश मोर्चात सहभागी झाल्यावर खासदार ते बोलत होते. जिल्हा बँकेचे अध्यक्ष माजी आमदार शिवाजी कर्डिले उपस्थित होते.

खासदार डॉ. विखे म्हणाले, राज्यात लव्ह जिहादचे प्रकार वाढले आहेत. ते थांबले पाहिजेत. अहमदनगर जिल्ह्यात जागरूक नागरिक आहेत. त्यामुळे, असे प्रकार थांबत आहेत. हिंदू समाजाच्या भावना तीव्र झाल्या आहेत.

त्यामुळे हिंदू जन आक्रोश मोर्चा निघत आहेत. संविधानात १८ वर्षांवरील सज्ञान तरुण-तरुणींना आंतरधर्मीय विवाहाला मान्यता आहे. परंतु, कायद्यात बदलाची काळाची गरज आहे. पंतप्रधान नरेंद्र मोदी व गृहमंत्री अमित शहा हिंदू जनभावनेचा आदर करून लव्ह जिहाद विरोधी कायदा करण्यासाठी सकारात्मक भूमिका घेतील, असे ते म्हणाले.

वाहतूक बंद

आक्रोश मोर्चामुळे आज सकाळी दहा ते दुपारी दोन वाजेपर्यंत नगर-मनमाड मार्गावरील वाहतूक बंद होती. ती वाहतूक बाभळेश्वर व नेवासे मार्गे वळविण्यात आली होती. वाहतूक वळविण्यात आली तरी रस्त्यावर दुतर्फा वाहनांच्या रांगा लागल्या होत्या.

असा होता बंदोबस्त

पोलिस अधीक्षक राकेश ओला, दोन अपर पोलिस अधीक्षक, सहा उपअधीक्षक, १८ पोलिस निरीक्षक, ४२ उपनिरीक्षक व सहाय्यक निरीक्षक, ३८० पोलिस कर्मचारी, राष्ट्रीय सुरक्षा दलाच्या दोन कंपन्या, शीघ्र कृती दलाची एक कंपनी असे ३०० जवान तैनात होते.