कर्जत-जामखेडला नाही होणार कांद्याचा वांदा...चार दिवसांत सुरू होणार खरेदी केंद्र

जामखेड ः मतदारसंघातील कर्जत व जामखेड तालुक्यात शेतकऱ्यांसाठी कांदा खरेदी केंद्र सुरू होणार आहेत. आमदार रोहित पवार यांनी नुकतीच व्हिडिओ कॉन्फरन्सिंग घेतली.

या बैठकीसाठी 'नाफेड ' आणि 'महा-एफपीसी'  या नामांकित कंपन्यांचे प्रमुख अधिकारी,
यापुर्वी जे कांदा खरेदी केंद्र होते त्यांचेही अधिकारी,
कर्जत-जामखेड दोन्ही  तालुक्याचे क्रुषि अधिकारी  व्हिडिओ कॉन्फरन्सिंमध्ये  सहभागी होते, अशी माहिती आमदार रोहित पवार यांच्या कार्यालयातून सोशल मीडियाद्वारे देण्यात आली.

तालुक्यातील कांदा उत्पादक शेतकऱ्यांना आता दिलासा मिळणार आहे. पुढील चार दिवसांमध्येच ही केंद्रे सुरू होणार आहेत. शेतकऱ्यांना कांदा विक्रीसाठी पर्याय मिळावा, कांदा विक्रीची समस्या निर्माण होऊ नये, भाववाढीनंतर कांद्याचे भाव संतुलित असावेत, कोणत्याही शेतकऱ्यांवर अन्याय होणार नाही, या बाबींचा विचार करुन शेतकऱ्यांच्या द्रुष्टीने हे पाऊल टाकले असल्याचे सांगितले आहे.

हेही वाचा - वो बुलाती है..मगर जाने का नही

व्हिडिओ कॉन्फरन्सिंग बैठकीत विविध मुद्द्यावर चर्चा झाली.या पूर्वी कांदा उत्पादक शेतकऱ्यांची राहिलेली रक्कमही अदा केली जाणार आहे. शेतकऱ्यांकडे असणारा कांदा माल बांधावर खरेदी करून त्याची या भागातच साठवणूक करण्यात येणार आहे. त्यामुळे शेतकऱ्यांना आपला कांदा बाजारपेठेत नेण्याच्या खर्चाबरोबरच बाजारपेठेतील इतर खर्चालाही आळा बसणार आहे.

याकरिता शेतकऱ्यांच्याच कांदाचाळी भाडे तत्वावर संबंधित कंपन्यांकडुन घेतल्या जाणार आहेत. त्यामुळे याचाही शेतकऱ्यांना अधिकचा फायदा होणार आहे. 'नाफेड' या कंपनीच्या मार्गदर्शनाखालीच ही कांदा खरेदी केंद्रे चालवली जाणार आहेत. कांद्याच्या पुर्ण उत्पादनापैकी काही टक्केवारी या केंद्राच्या माध्यमातुन घेतली जाणार आहे.

मतदारसंघात कांदा उत्पादन मोठ्या प्रमाणावर घेतले जाते. मात्र, बाजारभाव अनियमितता, वाहतूक आदीमुळे अनेकवेळा शेतकऱ्यांना मोठ्या नुकसानीचा सामना करावा लागतो. त्यामुळे कांदा पीक हे जुगार म्हणुनच घेण्याचा शेतकऱ्यांचा कल निर्माण झाला आहे. मात्र नाफेडच्या खरेदी केंद्राने कांदा उत्पादकांना योग्य न्याय मिळणार आहे, असल्याचे आमदार रोहित पवार यांच्या कार्यालयाकडून सोशल मीडियाद्वारे सांगण्यात आले.