पाथर्डी : तहसील कार्यालयात भाजयुमोचे आंदोलन

पाथर्डी: राज्य सरकारने इंधनाचे दर कमी करावेत, या मागणीसाठी आज (बुधवारी) भारतीय जनता युवा मोर्चाच्या कार्यकर्त्यांनी तहसील कार्यालयाच्या दारात  घोषणाबाजी केली. तुमच्या भावना वरिष्ठ कार्यालयास कळवण्यात येतील, असे आश्वासन नायब तहसीलदार भानुदास गुंजाळ यांनी दिल्यानंतर घोषणाबाजी बंद करण्यात आली.

युवा मोर्चाचे तालुकाध्यक्ष सचिन वायकर, बाळासाहेब गोल्हार, नारायण पालवे, शुभम गाडे, अमोल शेळके, हरिभाऊ वायकर, नवनाथ जिवडे, अंबादास दहिफळे, अशोक दहिफळे, किशोर राठोड आदी तहसील कार्यालयात गेले. दारात त्यांनी राज्य शासनाच्या निषेधाच्या घोषणा देत कार्यालय दणाणून सोडले.

या आंदोलनाची दखल घेत गुंजाळ आंदोलनस्थळी आले व त्यांनी निवेदन स्वीकारत, वरिष्ठ कार्यालयाला तुमच्या भावना कळवण्यात येतील, असे आश्वासन दिल्यानंतर आंदोलन विसर्जित करण्यात आले.