-सतीश वैजापूरकर
शिर्डी : साई संस्थानच्या तिजोरीत सुमारे पाचशे किलो सोने साचले आहे. त्यात दागिने स्वरूपातील सोने अधिक आहे. अलीकडच्या काही वर्षांत सोन्याच्या भावात दुपटीने वाढ झाल्याने या सोन्याने साई संस्थानच्या संपत्तीत तब्बल अडीचशे कोटी रुपयांची वाढ झाली. हे खरे असले, तरी देणगी स्वरूपात येणारे हे सोने साठवायला सध्या जागा कमी पडते आहे. स्टेट बॅंकेकडे हे सोने ठेवायला दिले, तर त्यावर अडीच टक्के व्याज मिळू शकते. मात्र, ही बाब न्यायप्रविष्ट झाल्याने त्यावर अद्याप निर्णय झालेला नाही. ही परिस्थिती अशीच कायम राहिली, तर देणगी स्वरूपात येणारे सोने साठविण्यासाठी विस्तारित जागा तयार करण्याची वेळ साई संस्थानवर येईल.