Suraj Pawar : सैराट फेम सूरज पवार चौकशीसाठी पोलीस ठाण्यात दाखल

राहुरी : मंत्रायलयात नोकरी लावण्याच्या आमिषाने सैराट फेम सूरज पवार आणि त्याच्या सहकाऱ्याने आर्थिक फसवणूक केल्याप्रकरणी त्यांच्यावर गुन्हा दाखल करण्यात आला होता. त्यानंतर पोलिसांच्या सांगण्यानुसार सूरज पवार उर्फ प्रिन्स चौकशीसाठी राहुरी पोलीस ठाण्यात दाखल झाल्याची माहिती समोर आली आहे.

(Sairat Suraj Pawar Latest News)

दरम्यान, सूरज पवार आणि त्याच्या सहकाऱ्यांविरोधात महेश वाघडकर या व्यक्तीने तक्रार दाखल केली होती. मंत्रालयात नोकरी लावून देतो म्हणून आर्थिक फसवणूक केल्याचा आरोप त्याने केला असून पोलिसांनी सूरज पवार याला नोटीस बजावत चौकशीसाठी हजर राहण्याचे आदेश दिले होते. त्यानंतर येत्या सोमवारी पुन्हा त्याला याप्रकरणी चौकशीसाठी हजर राहावे लागणार आहे.

या प्रकरणातील आरोपी दत्तात्रय क्षिरसागर (रा. नाशिक), आकाश शिंदे आणि ओमकार तरटे (रा. संगमनेर ) अशी आरोपींची नावे असून त्यांच्यावर भादवि कलम 420, 465, 467, 468, 471 नुसार गुन्हा दाखल करण्यात आला होता.

नेवासा तालुक्यातील महेश वाघडकर यांनी याप्रकरणी फिर्याद दिली होती. आरोपींनी मंत्रालयात नोकरीला लावण्यासाठी पाच लाखांची मागणी केली होती असा आरोप फिर्यादीने केला होता. त्यानुसार फसवणूक करणे, बनावट शिक्के आणि दस्तऐवज तयार केल्याप्रकरणी गुन्हा दाखल करण्यात आला होता. त्यानुसार चौकशी सुरू असल्याचं पोलिसांनी सांगितलं आहे.