ओव्हरटेक बेतला जिवावर; सख्या बहीण-भावाचा अपघातात दुर्दैवी मृत्यू

श्रीगोंदे (जि. अहमदनगर) : निमगावखलू (ता.श्रीगोंदे) येथून दौंडला शाळेत चाललेल्या सख्या बहीण व भावाचा अपघातात दुर्दैवी मृत्यू झाला. ही घटना दौंड येथील भीमा नदीच्या पुलाजवळ आज सकाळी नऊ वाजण्याच्या सुमारास घडली आहे.

आज (ता. 31) सकाळी हे दोघे बहीण भाऊ दौंड येथे शाळेत जाण्यासाठी निमगाव खलू येथून दौंडकडे जात होते. हॉटेल धनश्री समोर जुन्या टोल नाक्याजवळ एका टेम्पोला ओव्हरटेक करण्याच्या नादात दौंडकडून नगरच्या दिशेने जाणाऱ्या भरधाव पिकअपने या दोघा बहीण भावाना समोरून जोराची धडक दिली. यात दोघांचा जागीच मृत्यू झाला.

अनुष्का गणेश शिंदे (वय १६) व आदित्य गणेश शिंदे (वय १४) दोघे निमगावखलू अशी अपघातात मृत्यू पावलेल्या बहीण भावाची नावे आहेत. गरीब कुटुंबातील या सख्या बहीण भावाचा असा करूण अंत झाल्याने निमगावखलू गावासह परिसरावर शोककळा पसरली.