'मृत्युंजय दूत' करणार वाहनचालकांचे प्रबोधन

श्रीगोंदे (अहमदनगर) : नगर-सोलापूर महामार्गावरील अपघातांच्या प्रमाणात लक्षणीय वाढ झाली आहे. हे अपघात कमी करण्यासाठी व चालकांत जनजागृती करण्यासाठी घोगरगाव येथील छत्रपती शिवाजी विद्यालयातील विद्यार्थी व ग्रामस्थ 'हायवे मृत्युंजय दूत' म्हणून रस्त्यावर उतरणार आहेत.

महापालिकेचे 685 कोटीचे अंदाजपत्रक 'स्थायी' समोर सादर
 
घोगरगाव येथे महामार्ग पोलिस निरीक्षक शंकर शिंदे यांनी ग्रामस्थांची बैठक घेतली. यात प्रामुख्याने अपघात होवू न देणे, झाल्यास प्रथमोचार काय करावेत, अपघातग्रस्तांना कसे हाताळावे, याचे त्यांनी मार्गदर्शन केले. अपघात कमी करण्यासाठी व वाहनचालकांचे प्रबोधन करण्यासाठी हायवे मृत्युंजय दूत म्हणून पुढाकार घेण्याचे त्यांनी आवाहन केले.

त्यास छत्रपती शिवाजी विद्यालयातील विद्यार्थी व ग्रामस्थांनी प्रतिसाद दिला. या दूतांना लवकरच ओळखपत्र दिले जाणार आहे. सहायक फौजदार रमेश कुलांगे, शकील शेख, कपिल राजापुरे, सूर्यभान झेंडे, अभिमन्यू घनवट, पोलिस पाटील सुदाम बोरुडे, प्राचार्य अविनाश गांगर्डे उपस्थित होते.