....अन् सुतारवाडीत अचानक उतरले अज्ञात ड्रोन! नागरिकांत भिती

पारनेर (जि.अहमदनगर) : तालुक्यातील सुतारवाडी (ढवळपुरी) परीसरात एक अज्ञात ड्रोन आज (ता.७)अचानक उतरले. याबाबत कोणालाच काही माहीत नसल्याने परिसरातील नागरिकांमध्ये मात्र भितीचे वातावरण तयार झाले आहे. याबाबत तहसीलदार ज्योती देवरे यांनी नागरीकांना या ड्रोन पासून दूर रहावे कोणीही त्याच्या जवळ जाऊ नये असे आवाहन केले आहे. या घटनेमुळे नागरिक मात्र चांगलेच संभ्रमात पडले....

....अन् सुतारवाडीत अचानक उतरले अज्ञात ड्रोन!

याबाबत माहिती अशी की, आज (ता. ७ ) सायंकाळच्या सुमारास सुतारवाडी परिसरात एक अज्ञात ड्रोन उतरल्याने नागरिकांमध्ये भितीचे वातावरण निर्माण झाले. हे ड्रोन नेमके कोणाचे असावे? यात काही धोकादायक तर काही नसेल ना? या सर्व शंकांनी नागरीकांमध्ये दहशतीचे वातावरण तयार झाले होते. मात्र नेमके हे ड्रोन कोणी सोडले असावे? त्यात काय आहे त्यात काही स्फोटक तर नसेल ना? अशा प्रकारच्या शंका व अफवा परीसरात पसरविण्यात आल्या . या ठिकाणी बघ्यांनी मोठी गर्दी केली होती. याबाबत तहसीलदार ज्योती देवरे यांनी लष्करी अधिका-यांना कळविल्यानंतर लष्कारीचे अधिकारी मेजर भगिंदरसिंग हे त्या ठिकाणी आले व ते हे ड्रोन घेऊन गेले आहेत. हे ड्रोन लष्कराचेच असावे असा अंदाज उपस्थीतांनी व्यक्त केला आहे. ड्रोन अचानक उतरल्याचे समजल्या नंतर सुतारवाडी परीसरात काही काळ दहशतीचे वातावरण तयार झाले होते. त्यानंतर लष्करी अधिकारी येऊन ते घऊनही गेले. त्या नंतर मात्र परीसरातील नागरीकांनी सुस्कारा सोडला