राहुरी (जि. अहिल्यानगर) - वांबोरी (ता. राहुरी) येथे काल बुधवारी (ता. १९) रात्री साडेसात वाजता पंचमुखी महादेव मंदिराच्या शेजारील डोंगराजवळ एका महिलेचे शिर धडापासून वेगळे करून निर्घृण खून करण्यात आला. नंतर आरोपी स्वतःहून पोलीस ठाण्यात हजर झाला. मृत महिला व आरोपी दोघेही पुणे जिल्ह्यातील रहिवाशी आहेत. आरोपीने खुन केल्याची कबुली दिली आहे, अशी माहिती पोलीस निरीक्षक संजय ठेंगे यांनी दिली.
सोनाली राजू जाधव (वय-२८, रा. पोखरी, ता. आंबेगाव, जि. पुणे) असे मृताचे नाव आहे. तर सखाराम धोंडीबा वालकोळी (वय-५३, रा. निरगुडसर, ता. आंबेगाव, जि. पुणे) असे अटक केलेल्या आरोपीचे नाव आहे. पोलीस कॉन्स्टेबल सुनील निकम यांनी राहुरी पोलीस ठाण्यात आरोपीच्या विरोधात खुनाचा गुन्हा नोंदविला आहे.
माहिती समजताच अप्पर पोलीस अधीक्षक वैभव कलुबर्मे, पोलीस उपअधीक्षक डॉ.बसवराज शिवपुजे, पोलीस निरीक्षक संजय ठेंगे, पोलीस उपनिरीक्षक चारुदत्त खोंडे, ज्योती डोके, सुदर्शन बोडखे, हवालदार विकास साळवे, वाल्मीक पारधी, सुनील निकम, आजिनाथ पाखरे, संतोष राठोड, अजिनाथ पालवे, अंकुश भोसले, सतीश कुऱ्हाडे आदींसह फॉरेन्सिक पथकाने घटनास्थळी धाव घेतली. पंचनामा करून मृतदेहाचे धड व शिर उत्तरीय तपासणीसाठी हलविण्यात आले.
घटनेची माहिती देताना पोलीस निरीक्षक ठेंगे यांनी सांगितले की, 'आरोपी मुंबई येथे बीएमसी मध्ये नोकरी करीत होता. त्याला पाच मुली आहेत. मृत महिलेशी त्याचे विवाहबाह्य अनैतिक संबंध होते. महिलेचा पती एका प्रकरणात सात वर्षे जेलमध्ये सजा भोगत होता. त्यावेळी २०१७ साली आरोपीचे महिलेशी अनैतिक संबंध निर्माण झाले. आरोपीने पत्नी, मुली व नोकरी सोडून महिलेच्या समवेत घरोबा केला.'
'दोघेही दोन वर्ष आंबेगाव (जि. पुणे) येथे एकत्र राहिले. त्यानंतर दोघेही अहिल्यानगर येथे चार वर्षे राहिले. महिलेचा पती एक वर्षापूर्वी जेलमधून सजा भोगून बाहेर आला. त्यामुळे, ती महिला तीन महिन्यापासून पुन्हा पतीबरोबर शिक्रापूर (जि. पुणे) येथे राहत होती. ती आरोपीला फोन करून पैशांची मागणी करीत होती. आरोपीला गुन्हा दाखल करण्याची धमकी देत होती.'
'अखेर आरोपीने काल (बुधवारी) तिला भेटण्यासाठी बोलविले. दोघांची अहिल्यानगर येथे भेट झाली. सायंकाळी आरोपीने तिला वांबोरी शिवारात आणले. महादेव मंदिराच्या शेजारील डोंगराजवळ नेले. गप्पा मारल्या. मी तुझ्यासाठी गिफ्ट आणले आहे. डोळे बंद कर. असे आरोपीने महिलेला सांगितले.'
'महिलेने डोळे बंद केल्यावर आरोपीने तिच्या गळ्यावर कोयत्याने वार केला. छातीवर मोठा दगड टाकला. लाकडी दांडक्याने मारहाण केली. कोयत्याने तिचे शिर धडापासून वेगळे करून निर्घृण खून केला. नंतर आरोपी स्वतःहून पोलीस ठाण्यात हजर झाला. त्याने गुन्ह्याची कबुली दिली आहे.' असेही ठेंगे यांनी सांगितले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.