अकोला : जिल्ह्यातून १०१ वी गुन्हेगारी टोळी हद्दपार

अकोला : गुन्हेगारी टोळ्यांवर आळा बसणेकरिता दहिहांडा पोलिस स्टेशनच्या हद्दीतील टोळीने गुन्हे करणाऱ्या दोन गुन्हेगारांना जिल्ह्यातून दोन वर्षाकरिता हद्दपार करण्याचा आदेश पोलिस अधीक्षक जी. श्रीधर यांनी दिला. जिल्ह्यातून हद्दपार करण्यात आलेली ही १०१ वी टोळी आहे.दहिहांडा पोलिस स्टेशनचे प्रभारी अधिकाऱ्यांनी पोलिस स्टेशनच्या हद्दीतील टोळीने गुन्हे करणारे गुन्हेगार गोपाल प्रल्हाद वावरे (३४) रा. चोहट्टा बाजार आणि राहुल उर्फ गजानन सुरेश तायडे (३२) रा. देवळी, ता. अकोट यांचेवरील गुन्ह्यांची मालिका पाहता त्यांचे विरूध्द कलम ५५ महाराष्ट्र पोलिस अधिनियमान्वये अकोला जिल्ह्यातून दोन वर्षांकरिता हद्दपार करण्याबाबतचा प्रस्ताव तयार करून पोलिस अधीक्षक यांचे कडे सादर केला होता. त्यानुसार दोन्ही गुन्हेगारांना अकोला जिल्ह्यातून दोन वर्षांकरिता हद्दपार करण्यात आले आहे.(Akola Crime News)

आतापर्यंत २८६ गुन्हेगारांवर कारवाई

पोलीस अधीक्षक जी. श्रीधर यांनी अकोला जिल्हा पोलिस दलाचा पदभार स्वीकारल्यापासून आजपावेतो एकूण ५२ गुन्हेगारांविरूध्द एमपीडीए ॲक्ट अन्वये कारवाई करण्यात आली. ही आजपर्यतची अकोला जिल्ह्यातील सर्वांत मोठी कारवाई आहे. महाराष्ट्र पोलिस अधिनियम कलम ५५ अन्वये एकूण १०१ गुन्हेगारी टोळ्यांतील एकूण २४८ इसमांना तसेच कलम ५६ महाराष्ट्र पोलिस अधिनियम अन्वये ३८ इसम, असे एकूण २८६ गुन्हेगारांना आजपर्यंत अकोला जिल्ह्यातून तडीपार करण्यात आले आहे.(Crime news)