Akola Accident News : धावत्या दुचाकीच्या चाकात ओढणी अडकल्याने अपघात ; विवाहीत तरुणी गंभीर जखमी

बाळापूर : पतीसोबत दुचाकीवर घरी जात असताना विवाहितेची ओढणी गाडीच्या चाकात अडकली. यामुळे ती गाडीवरुन खाली पडली. खाली पडल्याने डावा हात मोडला असून ही विवाहिता गंभीर जखमी झाल्याची घटना पारस ते निमकर्दा मार्गावर शुक्रवारी ता. २२ रोजी सकाळी साडेदहा वाजताच्या सुमारास घडली. तेजस्विनी भोजने असे गंभीर जखमी झालेल्या विवाहितेचे नाव आहे.

पारस येथील माहेर असलेली तेजस्विनी ही विवाहित महीला तिच्या पती सोबत पारस येथे माहेरी गेली होती. माहेरहून आज शुक्रवारी सकाळी एमएच ३० बि आर ८९०९ या क्रमांकाच्या दुचाकीवरून ते दोघेजण गावी जात होते.

त्यावेळी त्यांची दुचाकी निमकर्दा नजीक हरिभाऊ गव्हाणकर विद्यालया जवळ पोहोचताच धावत्या दुचाकीच्या चाकात तेजस्विनीची ओढणी अडकून पडली होती. ओढणी चाकात अडकल्याने ती दुचाकीवरून रस्त्यावर पडली. दुचाकी भरधाव असल्याने तिच्या डाव्या हाताला गंभीर दुखापत झाली. यावेळी विद्यालयाच्या परीसरात असलेले कुंदन लोंढे आदी तरुणांनी घटनास्थळी धाव घेतली. रिधोरा येथील कुंदन लोंढे या तरुणाने आपल्या ऑटोरिक्षात टाकून उपचारासाठी तातडीने हलविण्यात आले.