Akola : ४४ हजार शेतकरी मदतीच्या प्रतीक्षेत!

अकोला : जून ते जुलै महिन्यात झालेल्या अतिवृष्टीमुळे जिल्ह्यातील शेतकऱ्यांचे नुकसान झाले. त्यामुळे बाधित शेतकऱ्यांना मदतीचे वितरण करण्यासाठी शासनाकडून १३४ कोटी २९ लाख रुपयांचा निधी मिळाला आहे. सदर निधीचे वितरण तालुकास्तरावर सुरु असून २३ ऑक्टोबरपर्यंत एक लाख २० हजार १८८ शेतकऱ्यांपैकी केवळ ७६ हजार १९२ शेतकऱ्यांच्या खात्यातच अतिवृष्टीची मदत जमा झाली आहे, तर ४३ हजार ९९६ शेतकऱ्यांना दिवाळीपूर्वी मदत मिळाली नाही. त्यामुळे मदत रक्कम मिळालेल्या शेतकऱ्यांचीच दिवाळी गोड झाल्याचे दिसून येत आहे.

जून, जुलै महिन्यात जिल्ह्यात जोरदार पाऊस झाला. बाळापूर व अकोला तालुक्यात पावसामुळे शेतीचे सर्वाधिक नुकसान झाले. शेती पिकांमध्ये कापूस, सोयाबीन, ज्वारी, मूंग, उडीद, भाजीपाला या पिकांना अतिवृष्टीचा सर्वाधिक फटका बसला. परिणामी शेती पिकांच्या नुकसानीचा प्राथमिक त्यानंतर अंतिम अहवाल तयार करून शासनाला पाठवण्यात आला होता. त्यानुसार शासनाने शेती नुकसानीसाठी निधी मंजूर केला आहे.

सदर निधी जिल्ह्याला प्राप्त झाल्यानंतर निधी तहसिलदारांच्या खात्यात वर्ग करण्यात आला. परंतु त्यानंतर जवळपास एक आठवडा सदर निधीचे वितरण रखडले होते. त्यानंतर शेतकऱ्यांच्या खात्यात मदत निधी जमा करण्यास सुरुवात झाली आहे.

परंतु अद्यापही एक लाख २० हजार १८८ शेतकऱ्यांपैकी ७६ हजार १९२ शेतकऱ्यांच्या बॅंक खात्यात मदत जमा झाली नाही. त्यामुळे दिवाळीच्या तोंडावर संबंधित शेतकरी मदतीची आस लावून बसले.

असे केले मदतीचे वाटप

• तालुका शेतकरी संख्या रक्कम

• अकोला १४८७५ १५ कोटी ४२ लाख

• बार्शीटाकळी ७१३३ ३ कोटी ६५ लाख ८ हजार

• अकोट १२४५८ १४ कोटी ९९ लाख ३५ हजार

• तेल्हारा ३४५२ २ कोटी ९ लाख २८ हजार

• बाळापूर ३३९४० ४० कोटी २६ लाख ७ हजार

• मूर्तिजापूर ४३३४ २ कोटी ६८ लाख ७३ हजार

• पातूर ४९ ३ लाख ३४

असे झाले होते नुकसान

जून, जुलै व ऑगस्ट महिन्यात जिल्ह्यातील १ लाख ४ हजार ८८८ शेतकऱ्यांचे एकूण ९ हजार ६६५.२९ हेक्टरवरील पिकांचे नुकसान झाले होते. त्यासाठी १२३ कोटी ६२ लाख ८८ हजार रुपये शासनाने मंजूर केले आहेत. त्यामध्ये जिरायती क्षेत्र, आश्वासित सिंचनाखालील क्षेत्र, बहुवार्षिक पिकाखालील क्षेत्राचा समावेश आहे.

वाटपाची टक्केवारी ५८.९१

जिल्ह्यातील मदत वाटपाची एकूण टक्केवारी ५८.९१ आहे. त्यामध्ये अकोला तालुका ३२.८९, बार्शीटाकळी ३३.३१, अकोट ७५.९१, तेल्हारा ८२.६१, बाळापूर ७९.६६, मूर्तिजापूर ७४.३२, पातूर तालुक्यात ९२.२७ टक्के मदतीचे वाटप दिवाळीपूर्वी करण्यात आले.