Accident : कंटेनर व दुचाकीच्या विचित्र अपघात; एकाच परीवारातील तीन जण ठार, तर अन्य तिघे जण जखमी

बाळापूर - दोन दुचाकींची समोरासमोर धडक झाल्याने दुचाकीवरुन खाली पडलेल्या तिघे जणांना भरधाव कंटेनरने चिरडल्याची घटना बाळापूर ते वाडेगाव दरम्यान अकोला टि पॉईंटवर सोमवारी रात्री साडे सात वाजताच्या सुमारास घडली आहे. या अपघातात एकाच परीवारातील तिघांचा घटनास्थळावरच मृत्यू झाला आहे. तर अन्य तिघेजण गंभीर जखमी झाले आहेत. जखमींना अकोला येथील सर्वोपचार रुग्णालयात दाखल करण्यात आले आहे.

प्राप्त माहितीनुसार बाळापूर येथील रहिवासी शेख. सादीक शेख रज्जाक (४५), शेख खालीद शेख रज्जाक (४४) व शेख माजीद शेख सादीक (२४) असे ठार झालेल्यांची नावे आहेत. हे तिघेही एकाच परीवारातील आहेत. आज सोमवारी रात्री साडेसात वाजताच्या सुमारास हा भिषण अपघात घडला आहे.

मृतक हे आपल्या एमएच ३० बि यू ०५३२ या दुचाकीने बाळापूरकडे येत होते. यादरम्यान समोरून येणाऱ्या दुचाकीने त्यांना धडक दिली. त्यामुळे दुचाकीवरील तिघेही महामार्गाच्या मधोमध दुचाकीवरुन खाली पडले. या दरम्यान बाळापूरकडून पातूरकडे जाणारा भरधाव कंटेनरने या तिघांना चिरडत पुढे निघून गेला.

अचानक तिघेही महामार्गावर पडल्याने कंटेनर चालकाचे वाहनांवरील नियंत्रण सुटल्याने हा भिषण अपघात झाला आहे. घटनेची माहिती मिळताच वाडेगाव पोलिस चौकीचे सहा. पोलीस उपनिरीक्षक पंकज कांबळे, पोलीस कर्मचारी अक्षय देशमुख ,अंकुश मोरे,राधेश्याम पटेल, रफीक शेख व पोलीस कर्मचाऱ्यांनी घटनास्थळी धाव घेतली.

एक तास वाहतूक विस्कळीत

या भिषण अपघातामुळे वाडेगाव ते पातूर मार्गावरील वाहतूक व्यवस्था कोलमडली होती. पोलिसांनी तातडीने तिघांचे मृतदेह अकोला येथे रवाना करून वाहतूक सुरळीत केली. या घटनेमुळे बाळापूर शहरात शोककळा पसरली आहे. या प्रकरणी जबाबदारी असलेल्या कंटेनर चालकाला कंटेनरसह ताब्यात घेतले आहे. पुढील तपास बाळापूर पोलिस करीत आहेत.