अकोला : शेतकऱ्यांना दिलासा वाढीव मदतीचे ३९ कोटी ३० लाख मंजूर

अकोला : अतिवृष्टी व ढगफूटी सदृष्य पावसाने जुलै महिन्यात १ लाख २२ हजार ४५६.८७ हेक्टर क्षेत्रावरील पिकं बाधित झाल्याने शासनाने शेतकऱ्यांसाठी ८४ कोटी ३६ लाख रुपयांची मदत दिली होती. सदर मदतीचे शेतकऱ्यांना वाटप सुद्धा करण्यात आले आहे. दरम्यान दिवाळीपूर्वी शासनाने शेतकऱ्यांना वाढीव मदत जाहीर केली होती, परंतु सदर मदतीसाठी शासनाने जिल्ह्यासाठी ३९ कोटी ३० रुपयांचा निधी मंजूर केला आहे. त्यामुळे शेतकऱ्यांना दिलासा मिळाला आहे.

गत वर्षी जिल्ह्यात आरंभी पावसाने दडी मारली होती. त्यामुळे अनेक गावातील पेरण्या उलटल्या होत्या. मात्र त्यानंतर कमी-अधिक प्रमाणात पाऊस झाल्यामुळे पिकांना संजिवनी मिळाली होती. मात्र २१ ते २४ जुलै दरम्यान प्रचंड पाऊस झाला हाेता. त्यानंतर ६ ते ९ आणि २० ते २८ सप्टेंबर या कालावधीत मुसळधार पावसाने शेतकऱ्यांचे प्रचंड नुकसान झाले हाेते.

या नुकसानाची कृषी, महसूल व जिल्हा परिषद यंत्रणेने संयुक्त पाहणी करून अहवाल तयार केला होता. त्यानुसार शासनाकडे मदत निधीची मागणी करण्यात आली होती. दरम्यान आता शासनाने अतिवृष्टी बाधितांना निधी उपलब्ध करुन दिला होता. परंतु शेतकऱ्यांना वाढीव मदत जाहीर केल्यानंतर सुद्धा शासनाने वाढीव मदत मंजूर केली नव्हती, परंतु आता याबाबतचा शासनादेश जारी करून महसूल व वन विभागाने शेतकऱ्यांसाठी वाढीव मदतीचे ३९ कोटी ३० लाख मंजूर केले आहेत.