कृषी विद्यापीठात शेतकरी-शास्त्रज्ञ सुसंवाद!

अकोला : डॉ. पंजाबराव देशमुख कृषी विद्यापीठाचे कुलगुरू डॉ. विलास भाले यांचे मार्गदर्शनात अकोला येथे विस्तार शिक्षण संचालनालयाचे वतीने ‘हवामान अनुकूल वाण, तंत्रज्ञान आणि पीक लागवड पद्धती’ वर शेतकरी शास्त्रज्ञ सुसंवाद संपन्न झाला.

कृषी महाविद्यालय अकोलाचे समिती सभागृहात अधिष्ठाता कृषी डॉ.महेंद्र नागदेवे यांच्या अध्यक्षतेत संपन्न झालेल्या या कार्यक्रमाचे प्रसंगी शेतकरी प्रतिनिधी सेंद्रिय शेती तज्ञ कु. नासरी चव्हाण, आयोजक संचालक विस्तार शिक्षण डॉ. राजेंद्र गाडे, सहयोगी अधिष्ठाता शिक्षण डॉ. नितीन कोष्टी, मुख्य विस्तार शिक्षण अधिकारी डॉ प्रमोद वाकळे तथा विषय तज्ञ डॉ. एकनाथ वैद्य, डॉ. श्याम घावडे, डॉ. विजय काळे यांची प्रमुख उपस्थिती होती.

परिसंवादाचे आयोजनामागील संकल्पना विषद करताना संचालक विस्तार शिक्षण डॉ. राजेंद्र गाडे यांनी बदलत्या परिस्थितीत शाश्वत शेती तंत्रज्ञान आत्मसात करणे अधिक हितकारक असून, जमिनीचे मगदुरानुसार व बाजारातील मागणी नुसार पिकांमधील बदल स्वीकारत विद्यापीठाचे सहयोगातून फायद्याची शेती अवलंबावी, असे आवाहन केले.

विद्यापीठामध्ये विविध पिकनिहाय, शास्त्रनिहाय विभाग कार्यरत असून, यांचा एकात्मिक पद्धतीने फायदा घेत शेतकरी बंधूंनी आपले हित साधावे, असे सांगताना विद्यापीठाचे अधिष्ठाता कृषी डॉ. महेंद्र नागदेवे यांनी आपल्या अध्यक्षीय मनोगतात कोरडवाहू शेती मधील विविध आव्हाने व संधी या विषयावर सविस्तर मार्गदर्शन केले. याप्रसंगी संपन्न झालेल्या तांत्रिक सत्रामध्ये वरिष्ठ संशोधन शास्त्रज्ञ कडधान्य विभाग डॉ एकनाथ वैद्य, डॉ. श्याम घावडे यांनी यांनी माहिती दिली. भर पावसातही शेतकरी बंधू भगिनींनी शेतकरी - शास्त्रज्ञ सुसंवाद कार्यक्रमाला उपस्थिती दर्शवीत शंका समाधान करीत मार्गदर्शनाचा लाभ घेतला. कार्यक्रमाचे सूत्रसंचालन मुख्य संपादक प्रा. संजीव कुमार सलामे यांनी तर आभार प्रदर्शन विद्यापीठाचे जनसंपर्क अधिकारी डॉ. किशोर बिडवे यांनी केले.