Akola News
esakal
अकोट: भल्या पहाटे समाजमाध्यमावर पेट्रोल संपणार असल्याच्या अफवाच्या मेसेजमुळे अनेकांची धांदल उडाली. नागरिक सकाळीच शहराबरोबरच शहराबाहेरील पेट्रोल पंपावर पेट्रोल खरेदीसाठी गर्दी करताना दिसले. त्यामुळे काही पेट्रोल पंपावरील पुरवठा संपून गेला होता. अफवाच्या बाजारामुळे गरज नसतानाही अनेकांनी वाहनात पेट्रोल साठवून ठेवल्याने गरजूंना शहरात पेट्रोलसाठी भटकंती करावी लागली होती.
शहरातील सर्वच पेट्रोल पंपावर पुरेशा प्रमाणात साठा आहे. कोठेच इंधनाचा तुटवडा नाही. सर्व पेट्रोल पंपावर नियमितपणे इंधनाचा पुरवठा केला जात असून, नागरिकांनी घाबरून जाऊन पेट्रोल पंपावर अनावश्यक गर्दी करू नये, असे जाहीर आवाहन प्रशासनाकडून करण्यात आले.