राशीन : शुक्रवारी (ता.२९) पॉझिटिव्ह आलेल्या रुग्णाच्या घरातील काल (३०) दोघाजणांचा रिपोर्ट कोरोना पॉझिटिव्ह आला. असतानाच आज पुन्हा त्याच कुटुंबातील आणखी दोघांचा रिपोर्ट पॉझिटिव्ह आल्याने राशीनकरांचे अक्षरशः धाबे दणाणले आहेत.

पहिल्या बाधित सहा वर्षीय मुलीला आज डिस्चार्ज देण्यात आला. आज पुन्हा दोघांचा रिपोर्ट पॉझिटिव्ह आल्याने कोरोनाच्या रुग्णांची संख्या पाच झाली आहे. आता तरी प्रशासन झोपेच्या सोंगातून बाहेर येणार का हा प्रश्नच आहे. राशीन ते पुणे आणि पुणे ते राशीन असा प्रवास केलेल्या रुग्णानंतर त्याची चौदा वर्षीय मुलगी, ऐंशी वर्षीय वडील, दुसरी मुलगी व मुलगा यांचा पॉझिटिव्ह रिपोर्ट आला  आहे. त्यामुळे हे रुग्ण राहत असलेल्या भाग हॉटस्पॉट झाला आहे.

हेही वाचा - अजितदादांचे कुकडीच्या पाण्याबाबतचे मोबाईल संभाषण व्हायरल

या भागातील अनेक घरात भीतीचे वातावरण आहे. या रुग्णाच्या कुटुंबाशेजारील सर्वच कुटुंब संस्थात्मक विलगीकरण कक्षात क्वारंटाईन करून कोरोनाची साखळी तोडण्यासाठी आवश्यक आहे. रुग्ण सापडलेल्या ठिकाणी दाटीवाटीची वसाहत असल्याने होम क्वारंटाईन करून येथे उपयोग होणार नाही. 

राशीनकरांसाठी कोरोनाचे पाच रुग्ण सापडल्याने धोक्याची घंटा वाजली आहे. आता लोकांनी स्वयंशिस्त पाळली  आणि प्रशासनाने उपाययोजना केल्या तरच कोरोनाची साखळी तुटेल. राशीनकरांनी सोशल डिस्टन्स पाळून सॅनिटायझरचा वापर करणे आजची गरज बनली आहे. 

या रुग्णांच्या संपर्कात आलेल्या लोकांचा आम्ही शोध घेत आहोत. संबंधिताना संस्थात्मक विलगीकरण कक्षात क्वारांटाईन करण्यात येईल.

डॉ. दिलीप व्हरकटे, राशीन