नगर ः जिल्हा परिषदेतील काही कर्मचाऱ्यांना संगणकज्ञान नसल्याने त्यांनी वैयक्तिक व्यक्तींना नेमले आहे. प्रशासनाचा कर्मचाऱ्यांवर वचक कमी झाल्यामुळेच हा प्रकार सुरू असल्याचे दिसते. सामान्य प्रशासनासह मुख्य कार्यकारी अधिकाऱ्यांचेही याकडे दुर्लक्ष झाल्याने आश्‍चर्य व्यक्त होत आहे. 

हेही वाचा ः प्रशासनाच्या इशार्यानंतर बॅंक बंदचा निर्णय

जिल्हा परिषदेत काही खासगी व्यक्तींकडून कर्मचारी कामकाज करून घेत आहेत. जिल्हा परिषदेची सर्वसाधारण सभा, स्थायी व बांधकाम विभागाच्या सभेतही या विषयावर चर्चा झाली.

पदाधिकाऱ्यांनी अशा व्यक्तींचा बंदोबस्त करून संबंधितांवर कारवाईची सूचना प्रशासनाला केली. मात्र, प्रशासनाच्या बोटचेप्या भूमिकेमुळे कर्मचाऱ्यांचे मनोबल उंचावले आहे. 

क्लिक करा ः जायकवाडीत एकाला जलसमाधी

बांधकाम विभागातील "त्या' व्यक्तीने आता शिक्षण विभागात बस्तान बसविले आहे. कर्मचाऱ्याच्या खुर्चीवर बसून तो काम करीत असल्याने, याबाबत जोरदार चर्चा सुरू आहे. खासगी व्यक्तीच्या नियुक्तीवरून बांधकाम विभागातील तीन कर्मचाऱ्यांना सामान्य प्रशासन विभागाने नोटीस बजावून खुलासा मागविला आहे.

मात्र, अद्याप त्यांनी खुलासा व कार्यकारी अधिकाऱ्यांचा त्यावरील अभिप्राय सादर केलेला नाही. त्यामुळे खासगी व्यक्तीच्या नियुक्तीला संबंधित अधिकाऱ्यांचीही साथ असल्याची चर्चा आहे. मुख्य कार्यकारी अधिकाऱ्यांनीच आता चौकशी करून कारवाई करावी, अशी मागणी होत आहे.

विशेष म्हणजे, बांधकाम विभागातील कर्मचाऱ्यांपेक्षा खासगी व्यक्तीला ठेकेदार सर्वाधिक ओळखतात. तोच प्रत्येक ठेकेदाराची ऊठ-बस करीत असतो.  

                                                 संपादन ः भाऊसाहेब काळोखे