राहुरी विद्यापीठ : महात्मा फुले कृषी विद्यापीठाच्या कांदाबियाणे विक्रीसाठी 10 जिल्ह्यांतील शेतकऱ्यांकडून मोठ्या प्रमाणात मागणी असते. दर वर्षी पोलिस बंदोबस्तात कांदाबियाणे विक्री करावी लागते. मात्र, या वर्षी कोविड-19च्या संक्रमणाच्या पार्श्‍वभूमीवर विद्यापीठातर्फे ऑनलाइन बियाणेविक्री होणार आहे.

विद्यापीठाने विकसित केलेले खरीप कांद्याचे वाण "फुले समर्थ' व "बसवंत-780' या वाणांचे सत्यप्रत बियाणे राज्य सरकारच्या आदेशानुसार, तसेच कुलगुरू डॉ. के. पी. विश्‍वनाथा, संशोधन संचालक डॉ. शरद गडाख यांच्या मार्गदर्शनाखाली ऑनलाइन विकणार असल्याचे विद्यापीठाचे प्रमुख बियाणे शास्त्रज्ञ डॉ. आनंद सोळंके यांनी सांगितले. त्यासाठी उद्या (सोमवारी) सकाळी 10 वाजेनंतर बियाणे उपलब्ध असेपर्यंत विक्री करण्यात येणार आहे.

हेही वाचा - या आठवड्यात तीन राशींच्या जातकांच्या नोकरीवर आहे गदा

बियाण्यासाठी ऑनलाइन पेमेंट झाल्यानंतर नोंदणी झालेल्या शेतकऱ्यांना पुढील उपलब्धतेचे ठिकाण व वेळ मोबाईलवर कळविण्यात येणार आहे.  शेतकऱ्यांनी https://www.phuleagromart.com या संकेतस्थळावर नोंदणी करावी. त्यासाठी नाव, आधार कार्ड, फोटो, तसेच 7/12 उतारा व पासपोर्ट फोटो आदी बाबी भराव्यात.

जाणून घ्या - दरेकर म्हणाले, ठाकरे सरकारने कोरोनाचा खेळ मांडला

नोंदणीनंतर ओटीपीद्वारे लॉगिन केल्यावर प्रोफाईलमध्ये पत्ता अपडेट करावा. त्यात "सीड' ऑप्शनमध्ये कांदाबियाण्यात दोन प्रकार व त्याची माहिती दिसेल. त्यात पेमेंट ऑप्शनमध्ये जाऊन ऑनलाइन पेमेंट करायचे आहे. व्यवहार झाल्यावर ट्रान्झॅक्‍शन क्रमांक तपासून, पैसे भरल्याची पावती डाऊनलोड करता येईल. बियाणे किती तारखेस व कुठे उपलब्ध होईल, याची माहिती नोंदणीकृत मोबाईलवर एसएमएसद्वारे दिली जाईल, अशी माहिती डॉ. सोळंके यांनी दिली.