पारनेर (जि.अहमदनगर) : गोरगरिबांच्या पतसंस्थेत असलेल्या ठेवींच्या जोरावर तालुक्यातील काही पुढाऱ्यांची मजा सुरू आहे. पतसंस्थेच्याच पैशातून गाड्या घेऊन फुशारक्या मारत ते फिरत आहेत. आता घराबाहेर येऊन ‘यांच्यामुळे कोरोना वाढतो,’ असे म्हणणारे कोरोनाच्या काळात दीड वर्ष कुठे गेले होते, असा सवाल आमदार नीलेश लंके (nilesh lanke) यांनी विरोधकांना करीत खरपूस समाचार घेतला.

मी समाजसेवा म्हणून राजकारण करत आहे - लंके
बाबुर्डी येथील विविध विकासकामांचा प्रारंभ व लोकार्पण प्रसंगी आमदार लंके बोलत होते.
या वेळी गावातील ५० कुटुंबांना जीवनावश्यक वस्तूंचे वाटप करण्यात आले. या वेळी सरपंच प्रकाश गुंड, बंडू साबळे, भाऊसाहेब भोगाडे, मोहन साबळे या वेळी उपस्थित होते. लंके म्हणाले, ‘‘विरोधकांकडे कार्यकर्ते शिल्लक राहिले नाहीत. राज्यात महाविकास आघाडीचे सरकार आहे, तरी सर्वपक्षीय माझ्या विरोधात उतरणार आहेत. विरोध फक्त गरिबांच्या पैशावर करत आहेत. मला राजकारणातून पैसे कमवायचे नाहीत किंवा कोणाच्या मालमत्ताही लुबाडायच्या नाहीत. मी समाजसेवा म्हणून राजकारण करत आहे. गावाच्या विकासात राजकारण आणता कामा नये, असेही लंके म्हणाले.

त्यांनाच निवडणुकीत उमेदवारी
जनतेची कामे केली तर जनता डोक्यावर घेऊन नाचते. आगामी जिल्हा परिषद व पंचायत समिती निवडणुकांसाठी जो कार्यकर्ता जनतेच्या मनात आहे, त्यालाच उमेदवारी दिली जाईल.