शिर्डी (जि. नाशिक) : पंतप्रधान नरेंद्र मोदी, माजी मुख्यमंत्री देवेंद्र फडणवीस यांच्यासह भाजपच्या अनेक वरिष्ठ नेत्यांबाबत आक्षेपार्ह विधाने केली तेव्हा भाजपने गुन्हे दाखल केले नाहीत. मात्र, महाविकास आघाडीचे हे सरकार पोलिस व प्रशासकीय यंत्रणेला हाताशी धरून राजकीय दहशतवाद निर्माण करीत असल्याचे मत भाजपचे ज्येष्ठ आमदार राधाकृष्ण विखे पाटील यांनी व्यक्त केले.

केंद्रीय मंत्री नारायण राणे यांच्यावर दाखल केलेला गुन्हा मागे घ्यावा, भाजप कार्यालयाची तोडफोड करणाऱ्यांवर गुन्हे दाखल करावेत, यासह अन्य मागण्यांचे निवेदन प्रांताधिकारी गोविंद शिंदे यांच्या कार्यालयासमोर आंदोलन करून देण्यात आले.

त्यावेळी विखे पाटील बोलत होते. भाजपचे जिल्हाध्यक्ष राजेंद्र गोंदकर, नगराध्यक्ष शिवाजी गोंदकर, माजी नगराध्यक्ष कैलास कोते, भाजपचे तालुकाध्यक्ष ज्ञानेश्वर गोंदकर, शहराध्यक्ष सचिन शिंदे, नगरसेवक जगन्नाथ गोंदकर, रवींद्र गोंदकर, रवींद्र कोते, ताराचंद कोते, गणेश कारखान्याचे अध्यक्ष मुकुंदराव सदाफळ, गणेशचे संचालक मधुकर कोते, कैलास सदाफळ, पोपट शिंदे, गणेश कोते, विकास गोंदकर, सोमराज कावळे, सुधीर शिंदे आदी उपस्थित होते.

आमदार विखे म्हणाले, की सरकारविरोधी जनमताची भूमिका मांडणे, तसेच आघाडी सरकारच्या मंत्र्यांच्या भ्रष्टाचारावर बोलणाऱ्यांची मुस्कटदाबी केली जात आहे. याची मोठी किंमत भविष्यात विकास आघाडी सरकारला मोजावी लागेल. महाविकास आघाडीचा ड्रामा जनतेने बघितला आहे. पोलिसांना पुढे करून हे सरकार राजकीय दहशतवाद करीत आहे. मात्र, कायदे व नियम धाब्यावर बसवून, सत्तेचा गैरवापर करीत कोणालाही अटक करता येऊ शकते, हा सरकारचा भ्रम मोडीत निघाला आहे. भारतीय जनता पक्षाच्या जनआशीर्वाद यात्रेला राज्यात मिळणारा प्रचंड प्रतिसाद बघता, आघाडी सरकारच्या मंत्र्यांमध्ये अस्वस्थता निर्माण झाली आहे. यात्रेला रोखण्यासाठी हा प्रकार केल्याचा आरोपही यावेळी त्यांनी केला. नगराध्यक्ष शिवाजी गोंदकर, जिल्हाध्यक्ष राजेंद्र गोंदकर, ॲड रघुनाथ बोठे यांनीही मत व्यक्त केले.