अहमदनगर : आपला आर्थिक स्तर उंचावावा, असे प्रत्येकाला वाटत असते. त्यासाठी त्यांची धडपड सुरू असते. सध्या अशीच धडपड जिल्ह्यातील काही शिक्षकांकडून सुरू आहे. अध्यापनाकडे दुर्लक्ष करून काही जण प्लॉटिंग, विमा व हातउसने पैसे देऊन त्याची वसुली, यातच धन्यता मानत असल्याने, आता ‘गुरुजी, अध्यापनाकडे बघा’ असे म्हणण्याची वेळ पालकांवर आली आहे.

जिल्ह्यात पहिली ते बारावीपर्यंतच्या पाच हजार ३०२ शाळा आहेत. त्यांत सुमारे ३२ हजार ५२० शिक्षक अध्यापनाचे काम करतात. यामध्ये पती-पत्नी व एकल शिक्षकांचा समावेश आहे. मात्र, काही शिक्षकांनी नोकरीतून मिळणाऱ्या पगाराबरोबरच विमा, प्लॉटिंग, सोयरीक जुळवणे, हातउसने पैसे देणे, असे उद्योग सुरू केले आहेत. हे व्यवहार संबंधितांकडून पत्नी, मुले व मेहुण्यांच्या नावांवर सुरू आहेत.

सध्या कोरोनामुळे शाळा ऑनलाइन सुरू असल्याने, हे उद्योग मोठ्या प्रमाणात सुरू आहेत. यामध्ये विमा व हातउसने पैसे देण्याचे प्रकार वाढत आहेत. त्यासाठी काहींनी व्यावसायिक व सर्वसामान्यांना गळाला लावले आहे. हातउसने पैसे देतानाची टक्केवारी वाढली असून, वसुलीसाठी काही वेळा दमबाजीचे प्रकार काही ठिकाणी घडू लागले आहेत. काही शिक्षकांच्या या उद्योगामुळे सर्वसामान्य शिक्षकांना त्रास सहन करावा लागत असून, ते नाराजी व्यक्त करीत आहेत. दरम्यान, शिक्षकांनी अध्यापनाबरोबर गावाकडील शेती फुलवली, तर त्याचा समाजात एक चांगला संदेश जाऊन, शेतीमध्ये अनेक विकासकामे होऊ शकतात. त्यामुळे शिक्षकांनी प्लॉटिंग, विम्यासह इतर कामांत लक्ष देण्याऐवजी शेतीकडे कल वाढवावा, अशी अपेक्षा व्यक्त होत आहे.

शिक्षकांनी अध्यापन सोडून प्लॉटिंग, विम्याची कामे करणे चुकीचे आहे. सध्या काही जण हातउसने पैसे देऊन व्याजाचा व्यवसाय करू लागल्याच्या तक्रारी कानावर येत आहेत. असे प्रकार त्वरित थांबविण्यात यावेत.
- जालिंदर वाकचौरे, सदस्य, शिक्षण समिती, जिल्हा परिषद.

शिक्षक आपल्या कौशल्याचा उपयोग करून उत्पन्न वाढवत असेल, तर त्यात गैर काही नाही. शाळा सोडून कोणीही असे उद्योग करत नाही. उलट फावला वेळ कारणी लागतो. असे अनेक शिक्षक, शाळा व मुलांसाठी स्वतःचा अतिरिक्त पैसा खर्च करीत असतात. उलट ही सकारात्मक बाब आहे.
- डॉ. संजय कळमकर, शिक्षक नेते

नियमबाह्य कामे कोणी करीत असतील, तसेच पुराव्यानिशी तक्रारी प्राप्त झाल्यास संबंधितांवर नियमानुसार कारवाई करण्यात येईल.
- अशोक कडूस, शिक्षणाधिकारी, माध्यमिक विभाग