तेल्हारा (अकोला) : तेल्हारा तहसील कार्यालयात कार्यरत असणारे दोन कर्मचारी कार्यालयीन वेळेत कार्यालयाला दांडी देत भूखंडाच्या खरेदी विक्रीचे सौदे घडवून आणण्यात मग्न आहेत. ही महसूल कर्मचाऱ्यांची जोडी तालुक्यात ‘प्रॉपर्टी ब्रोकर’ म्हणून प्रसिद्ध आहे.

वाहतूक पोलिसांचे ‘ई-चलन’ ठरते वाहनचालकांची डोकेदुखी

तेल्हारा तहसीलचे प्रभारी तहसीलदार राजेश गुरव यांनी अवैध्य वाळू तस्करच्या विरोधात मोहीम उघडली आहे. अनेक कारवाया करत लाखो रुपयांचा महसूल वसूल केला. त्यांनी आपल्या कार्याची छाप पाडत अवैध वाळू तस्करांमध्ये दहशत निर्माण केली आहे. दुसरीकडे त्यांची प्रशासकीय कामावरील पकड सैल झाली असल्याचे चित्र आहे. कार्यालयात कर्तव्यावर असणारे दोन कर्मचारी कार्यालयीन वेळेत हलचल बुकावर कुठलीही नोंद न करता, रजेचा अर्ज न टाकता कार्यालयाला दांड्या मारत आहेत. लोकांच्या विक्रीस असलेली शेती, प्लॉट, इमारती पाहण्यात व त्यासाठी ग्राहक शोधण्यात हे कर्मचारी मग्न आहेत. कमी दरात खरेदी केलेली मालमत्ता विक्रीचे सौदे करून व जास्त भाव मिळवित कमिशन लाटण्याचे काम ही जोडी कार्यालयीन वेळेत खुलेआम करताना दिसत आहे.

 ताज्या बातम्यांसाठी डाऊनलोड करा ई-सकाळचे ऍप 

बदली होऊनही तेल्हाऱ्यातच तळ

तहसील कार्यालयातील दोन कर्मचाऱ्यांची दीड वर्षापूर्वी बदली झाली आहे. त्यानंतरही हे दोन्ही कर्मचारी तेल्हारा तहसीलमध्ये तळ ठोकून बसले आहेत. एकीकडे शासनाकडून हे कर्मचारी वेतन घेत असून, दुसरीकडे प्रॉपर्टी डीलिंगमध्ये लाखोंचे कमिशन जमा करताना दिसत आहेत. विशेष म्हणजे, तहसीलदारही त्यांच्या कार्यालयातील या दांडी बहाद्दर कर्मचाऱ्यांवर कारवाई करीत नसल्याने अकेन उलटसुलट चर्चेला उत आला आहे.