Margashirsha Guruvar Vrat : व्रत वैकल्यांचा महिना म्हणजे मार्गशीर्ष महिना 24 नोव्हेंबर पासून सुरु होत आहे. या महिन्यात महालक्ष्मी व्रतांची सुरुवात होते. महालक्ष्मीचे व्रत मार्गशीर्षातील चारही गुरुवारी स्त्रीया मनोभावे पुर्ण करतात. यंदाचा योगायोग म्हणजे मार्गशीर्ष महिन्याची सुरुवात देखील गुरुवार पासून होत आहे. मात्र यंदांच्या मार्गशीर्ष महिन्यात 5 गुरुवार येत आहेत. त्यामुळे गुरुवारचे व्रत हे 4 गुरुवार करावे की 5 गुरूवार असा संभ्रम निर्माण झाला आहे. चला तर यावर धर्म अभ्यासक पं. नरेंद्र धारणे यांच्याकडून उपाय जाणून घेऊया.

सुख- शांती देणारे गुरुवार व्रत

पं. नरेंद्र धारणे सांगतात, कुटुंबात सुख- शांती नांदावी, दुःख, रोगांचा नाश व्हावा अन् धन- धान्याची संपन्नता लाभावी यासाठी स्त्रीया या महिन्यात दर गुरुवारी श्री महालक्ष्मीची मोठ्या भक्तीभावाने पूजा अर्चा करतात. यंदा मार्गशीर्ष महिन्यात 5 गुरुवार आल्याने लोकांना प्रश्न आहे की 4 गुरुवार करावे की 5 गुरूवार करावे? यासह शेवटचा गुरुवार अमावास्यायुक्त असल्याने या दिवश व्रत करावे का?

हेही वाचा : गरज आहे पंढरपूर पुन्हा समतेचे पीठ होण्याची....

मात्र धर्मसिंधू आणि निर्णयसिंधु ग्रंथानुसार अमावस्यायुक्त गुरुवार असेल तरी तो गुरुवार व्रत करण्यासाठी योग्य मानण्यात येतो. त्यामुळे या दिवशी उपवास करावे यासह नित्य नियमानुसार व्रत पुर्ण करावे. यासाठी कुठलीही शंका मनात ठेवण्याचे कारण नाही. याउलट मार्गशीर्षात देवीचे व्रत करण्यासाठी एक गुरुवार अधिक मिळाला असल्याने भक्तीभावाने पुजन करावे.