बंगळूर : अयोध्येतील राममूर्ती प्राणप्रतिष्ठापनेच्या (Ayodhya Ram Mandir) पार्श्‍वभूमीवर आज (ता. २२) कर्नाटकात कोणतीही सरकारी सुटी जाहीर केली जाणार नाही, असे मुख्यमंत्री सिद्धरामय्या (Siddaramaiah) यांनी स्पष्ट केले आहे. राममंदिराच्या उद्‌घाटनानिमित्त सोमवारी शासकीय सुटी जाहीर करावी, अशी मागणी हिंदू संघटना आणि भाजपसह विविध संघटनांनी (Hindu Association) केली.

मात्र, मुख्यमंत्री सिद्धरामय्या यांनी सुटी जाहीर करणार नसल्याचे स्पष्ट केले आहे. तुमकूरमध्ये प्रसारमाध्यमांशी ते म्हणाले की, आज धर्मादाय खात्याच्या मंदिरात विशेष पूजा होणार आहे; पण सरकारी सुटी असणार नाही. मीही आज महादेवपूर येथील राम मंदिराचे उद्‌घाटन करत आहे. मला या कार्यक्रमासाठी आमंत्रित करण्यात आले आहे.

धर्मात राजकारण नको - शिवकुमार

सिद्धरामय्या यांच्या नावात राम आहे, माझ्या नावात शिव आहे. राजकारणात धर्माची गरज आहे, धर्मात राजकारणाची नाही, असे उपमुख्यमंत्री डी. के. शिवकुमार म्हणाले. ‘आम्ही भक्ती, आदर आणि धर्माच्या संवर्धनासाठी करत नाही. मंदिरात कोणते विधी करावेत. हे आम्हाला कोणी सांगण्याची गरज नाही. आमचा विश्वास आहे की प्रार्थनेचे फळ मिळेल. आम्हाला कोणी सांगण्याची किंवा दबाव आणण्याची गरज नाही, असे सांगत त्यांनी सरकारी सुटी देण्यास अप्रत्यक्षपणे नकार दिला आहे.