बेतिया: बिहारमधील पश्चिम चंपारणमधील बेतियामध्ये काल एक धक्कादायक घटना घडली आहे. एका व्यक्तीचा कोठजीत मृत्यू झाल्यानंतर संतप्त झालेल्या जमावाने थेट पोलीस स्टेशनलाच आग लावल्याची घटना समोर आली आहे. या घटनेनंतर पोलीसांवर देखील हल्ला करण्यात आल्याचं समजतंय.

कोठडीत एका व्यक्तीचा मृत्यू झाल्यानंतर पोलीस स्टेशनजवळ हा जमाव जमला होता. डीजे वाजवल्याप्रकरणी पोलीसांनी मृत व्यक्तीला ठाण्यात आणल्याचं सांगण्यात येतंय. यानंतर पोलिसांनी त्याला मारहाण केल्याने त्याचा मृत्यू झाल्याचा आरोप त्याच्या नातेवाईकांनी केला आहे. या घटनेमुळे संतप्त झालेल्या लोकांनी थेट पोलीस ठाण्यावर हल्ला करत आग लावली.

संतप्त जमावाने यावेळी आजूबाजूला उभ्या असणाऱ्या वाहनांना देखील आग लावली. यावेळी पोलीस आपला जीव वाचवण्यासाठी ठाण्यातून पळून गेले. त्यानंतर जमावाकडून पोलिसांवर दगडफेक देखील करण्यात आली. या घटनेत एका पोलिसाचा मृत्यू झाल्याची देखील माहिती समोर आली आहे.