हैदराबाद: हैदराबादमधील मुलुगु जिल्ह्यातील वेंकटपुरम गावामध्ये आज रविवारी एक विचित्र घटना घडली आहे. सीआरपीएफ हेड कॉन्स्टेबलने (CRPF Head Constable) एसआयलाच गोळी मारुन त्याची हत्या केली आहे. इतकंच नव्हे तर त्यानंतर त्याने स्वत:लाही गोळी मारली आहे. जखमी अवस्थेतील या आरोपी हेड कॉन्स्टेबलला सध्या दवाखान्यामध्ये भरती करण्यात आलं आहे.

ही घटना सीआरपीएफ कॅम्पमध्ये घडली असून या घटनेनंतर मोठा तणाव निर्माण झाला आहे. जवानांनी या घटनेची माहिती त्वरित आपल्या वरिष्ठ अधिकाऱ्यांना दिली. हेड कॉन्स्टेबलने चालवलेल्या गोळीमुळे एसआयचा जागीच मृत्यू झाला आहे. (Central Reserve Police Force)

मात्र, अद्याप या घटनेमागचं कारण स्पष्ट झालं नाहीये. पोलिसांनी गुन्हा नोंद केला असून सध्या या घटनेचा तपास सुरु आहे. सोबतच पोलिस याचा देखील तपास करत आहेत की, दोघांच्या दरम्यान आधीपासूनच कोणता वाद अथवा भांडण होतं का? या प्रश्नाच्या उत्तरानंतर या घटनेमागचं कारण सुस्पष्ट होऊ शकेल.