श्रीनगर- जम्मू-काश्मीरमधील पुंछ जिल्ह्यामध्ये तीन नागरिकांची हत्या झाली होती. भारताचे संरक्षण मंत्री राजनाथ सिंह यांनी मृत नागरिकांच्या कुटुंबियांची भेट घेतली आहे. तसेच जखमींची हॉस्पिटलमध्ये जाऊन विचारपूल केली. राजनाथ सिंह सुरक्षा स्थितीची पाहणी करण्यासाठी जम्मू-काश्मीरमध्ये गेले आहेत. यावेळी त्यांनी कुटुंबियांची भेट घेत त्यांचे सांत्वन केले. (Defence Minister Rajnath Singh met families of civilians killed in Jammu and Kashmir Poonch district)

जम्मू काश्मीरमध्ये सुरक्षा दलावर हल्ला झाला होता. ज्यात चार जवान शहीद झाले होते तर दोनजण जखमी झाले होते. त्यानंतर लष्कराकडून आठ स्थानिक नागरिकांना चौकशीसाठी ताब्यात घेण्यात आले होते. यातील तीन जणांचा संशयास्पदरित्या मृत्यू झाला होता. तर इतर पाच जणांना हॉस्पिटलमध्ये दाखल करण्यात आले होते. याप्रकरणी लष्कराने तपास सुरु केला आहे.

राजनाथ सिंह यांनी बुधवारी हॉस्पिटलमध्ये जाऊन जखमी नागरिकांची विचारपूस केली. तसेच मृत पावलेल्या नागरिकांच्या कुटुंबियांची भेट घेतली. लष्कर प्रमुख मनोज पांडे हे देखील राजोरी जिल्ह्यात पोहोचले आहेत. त्यांनी देखील सरकारी हॉस्पिटलमध्ये जाऊन जखमी नागरिकांची विचारपूस केली.

दोषी अधिकाऱ्यांवर कारवाई करण्याचे आश्वासन राजनाथ सिंग यांनी दिले असल्याची माहिती, शेहनाझ घनाई यांनी दिलीये. राजनाथ सिंह सकाळी म्हणाले होते, की लष्कराने देशाचे रक्षण करण्याबरोबरच लोकांचे मनं जिंकण्याचे काम करावे आणि अशा प्रकारची चूक पुन्हा करु नये.

दरम्यान, तीन नागरिकांच्या संशयास्पद मृत्यूनंतर लष्कराने याची गंभीर दखल घेतली आहे. याप्रकरणी तपास सुरु करण्यात आला आहे. तसेच एका ब्रिगेडियर दर्जाच्या अधिकाऱ्याची बदली करण्यात आली आहे. तसेच तीन अधिकाऱ्यांवर कारवाई करण्यात आली आहे. (Latest Marathi News)