बंगळूर : आपणास राजकीयदृष्ट्या संपवण्याचे मोठे षड्‍यंत्र सुरू असल्याचा आरोप उपमुख्यमंत्री डी. के. शिवकुमार (D. K. Shivakumar) यांनी केला. बेकायदेशीर मिळकत प्रकरणात सीबीआयने (CBI) त्यांना नोटीस बजावल्याबद्दल पत्रकारांशी ते संवाद साधत होते.

ते म्हणाले, राज्य सरकारने या प्रकरणाच्या चौकशीची परवानगी मागे घेतल्यानंतरही ही नोटीस बजावली आहे. माझा छळ करून आपल्याला राजकीयदृष्ट्या संपवण्याचे सुरु आहे. यात काही मोठे लोक आहेत. त्यांचे मोठे षड्‍यंत्र सुरू आहे, असेही ते म्हणाले.

सरकारने आधीच खटला मागे घेतला आहे. मात्र, ते कोणत्या कारणाने नोटीस दिली माहीत नाही. सीबीआय प्रथम त्यांचा तपास फर्म स्तरावर पूर्ण करेल आणि नंतर ते वैयक्तिकरित्या माझ्याकडे येतील.

आपल्याला तुरुंगात टाकण्यात त्यांना रस असेल तर तुरुंगात टाकू द्या, असा संताप त्यांनी व्यक्त केला. आपण काहीही चुकीचे केलेले नाही. त्यामुळे कशाचीही भीती नाही. आपल्याला न्याय मिळेल. सरकारने हे प्रकरण लोकायुक्तांना आधीच दिले आहे. लोकायुक्त पुढील चौकशी करणार असल्याचे त्यांनी सांगितले.