नवी दिल्ली : दिल्लीचे आरोग्यमंत्री सत्येंद्र जैन (५७) यांच्या मित्राच्या घरातून अंमलबजावणी संचालनालयाला (ईडी) २.८२ कोटींची रोकड (cash) मिळाल्याचे सांगण्यात येत आहे. सोबतच एक किलोहून अधिक सोनेही सापडले. यामध्ये १३३ सोन्याच्या नाण्यांचा (gold coin) समावेश आहे. ईडीने जैन यांच्या घरातून मोठी रोकड आणि सोने जप्त केले आहे. सत्येंद्र जैन सध्या ईडीच्या कोठडीत आहे. (ED Action 2.82 crore and gold coins found in Jains friends house)

ईडीने सोमवारी सत्येंद्र जैन यांच्या निवासस्थानावर आणि इतर ठिकाणांवर छापे टाकले. जैन (Satyendra Jain) यांना ३० मे रोजी अटक करण्यात आली होती. त्यांना ९ जूनपर्यंत ईडी कोठडी सुनावण्यात आली आहे. एप्रिलमध्ये ईडीने चौकशीचा भाग म्हणून सत्येंद्र जैन यांच्या कुटुंबाची ४.८१ कोटींची मालमत्ता, त्यांच्या मालकीच्या आणि नियंत्रित कंपन्या जप्त केल्या होत्या.

ईडीने (ED) निवेदनात म्हटले आहे की, पीएमएलएअंतर्गत अकिंचन डेव्हलपर्स प्रायव्हेट लिमिटेड, इंडो मेटल इम्पेक्स प्रायव्हेट लिमिटेड, प्रयास इन्फोसोल्युशन प्रायव्हेट लिमिटेड, मंगलायतन प्रोजेक्ट्स प्रायव्हेट लिमिटेड, जेजे आयडियल इस्टेट प्रायव्हेट लिमिटेड, स्वाती जैन, वैभव जैन यांची पत्नी, अजित यांच्यावर गुन्हा दाखल केला आहे. प्रसाद जैन यांच्या पत्नी सुशीला जैन आणि सुनील जैन यांच्या पत्नी इंदू जैन यांच्या ४.८१ कोटींच्या स्थावर मालमत्ता जप्त करण्याचा तात्पुरता आदेश जारी करण्यात आला आहे.

सेंट्रल ब्यूरो ऑफ इन्व्हेस्टिगेशनने (सीबीआय) ऑगस्ट २०१७ मध्ये सत्येंद्र जैन (Satyendra Jain) आणि इतरांविरुद्ध बेहिशोबी मालमत्ता बाळगल्याबद्दल गुन्हा नोंदवल्यानंतर जैन यांच्याविरुद्ध मनी लॉन्ड्रिंगचा खटला पुढे आला. सीबीआयने डिसेंबर २०१८ मध्ये आरोपपत्र दाखल केले होते.

त्यात म्हटले होते की, २०१५-१७ मध्ये कथित बेहिशोबी मालमत्तेचे मूल्य १.४७ कोटी होते. जे त्यांच्या ज्ञात उत्पन्नाच्या स्रोतांपेक्षा सुमारे २१७ टक्के जास्त होते. आयकर विभागानेही या व्यवहारांची चौकशी केली होती आणि जैन यांच्या कथित बेनामी मालमत्ता जप्त करण्याचे आदेश जारी केले होते.