अंमलबजावणी संचालनालय (ED) ने गुरुवारी पत्रकार राणा आयुब (Rana Ayyub) यांचे कथित मनी लाँड्रिंग प्रकरणी तब्बल 1.77 कोटी रुपये जप्त केले आहेत. केंद्रीय तपास संस्थेने अय्युब यांच्यावर देणगी म्हणून मिळालेल्या पैशाचा वैयक्तिक खर्चासाठी वापर केल्याचा आरोप केला आहे.

दरम्यान उत्तर प्रदेश पोलिसांनी सप्टेंबरमध्ये दाखल केलेल्या एफआयआरच्या आधारे ईडीने गेल्या वर्षी अय्युब यांच्याविरुद्ध चौकशी सुरू केली होती. यूपी पोलिसांकडे केलेल्या तक्रारीत, तक्रारदार विकास सांकृत्यायन यांनी आरोप केला होता की, राणा अय्युब यांनी केट्टोसंबंधीत मदत निधी मोहिमेद्वारे बेकायदेशीरपणे सार्वजनिक पैसे मिळवले होते.

त्यांनी कथितपणे 3 सामाजिक कामासाठी दिलेल्या देणग्या योग्य हेतूसाठी वापरल्या नाहीत. देणग्यांचा काही भाग कथितपणे वैयक्तिक खर्चासाठी वापरला गेला, असा आरोप ईडीचे अधिकारी करत आहेत

ईडी आणि आयकर विभाग दोन्ही या प्रकरणातील आर्थिक व्यवहारांची चौकशी करत आहेत. तसेच ईडीने असा दावा केला आहे की अय्युब यांना एफसीआरए (फॉरेन कंट्रीब्युशन रेग्युलेशन अॅक्ट) अंतर्गत कोणतीही मान्यता न घेता परदेशी देणग्या मिळाल्या आहेत, परदेशातून कोणताही देणगी घेण्याआझी मान्यता घेणे अनिवार्य आहे.