नवी दिल्ली : दिल्लीच्या सीमेवर गेल्या 2 महिन्यांपासून शेतकरी आंदोलन सुरु आहे. सरकारने पारित केलेले कृषी कायदे रद्दबातल करावेत, अशी शेतकऱ्यांची मागणी आहे. सध्या गाझीपूर, सिंघू आणि टिकरी बॉर्डरवर मोठ्या प्रमाणावर फौजफाटा तैनात करण्यात आला आहे. यादरम्यान पोलिसांचा उत्साह वाढवण्यासाठी सिंघू बॉर्डरवर ठिकठिकाणी डीजे लावण्यात आले आहेत.

हेही वाचा - 'मोदीजी, आपल्याच शेतकऱ्यांशी युद्ध?' प्रियंका गांधींची पंतप्रधानांवर टीका

तसेच या डीजेवर बॉर्डर चित्रपटातील गाणं 'संदेसे आते है' हे लावण्यात येत आहे.  मात्र, शेतकरी आंदोलकांनी सातत्याने हा डीजे बंद करण्याची मागणी लावून धरली आहे. त्यांचं म्हणणं आहे की, या डीजेमुळे त्यांना अनेक अडचणींना सामोरे जावे लागत आहे. किसान मजदूर संघर्ष समितीद्वारे काढण्यात आलेल्या प्रेस रिलीजमध्ये हा डीजे बंद करण्याची मागणी करण्यात आली आहे. 

हेही वाचा - 'सरकारनं भींती उभारायचं काम करु नये'; राहुल गांधींची मोदी सरकारवर टीका

राजधानी दिल्लीमध्ये 26 जानेवारी रोजी झालेल्या हिंसेनंतर आंदोलन गुंडाळलं जाईल की काय, अशी शंका उपस्थित करण्यात येत होती. मात्र पुन्हा एकदा शेतकऱ्यांनी आपला निर्धार पक्का करत या आंदोलनावर पकड मिळवली आहे. यानंतर मोठ्या संख्येने लोक आंदोलनस्थळी पोहोचत आहेत. याला प्रत्युत्तर म्हणून सध्या बॉर्डर्सवर मोठमोठाले बॅरिकेड्स उभे करण्यात आले आहेत. तसेच टोकदार असे खिळे रस्त्यावर ठोकण्यात आले आहेत. जेणेकरुन शेतकऱ्यांना अडवता येईल. तसेच या भागातील इंटरनेट सुविधा देखील बंद करण्यात आली आहे.