'एक डुलकी, एक अपघात' असा फलक प्रत्येकानेच प्रवास (Travelling) करताना वाचला असेल. गाडी चालवणाऱ्या प्रत्येकाला (Driver) डुलकीमुळे होणाऱ्या अपघातांबद्दल (Road Accidents) चांगलीच माहिती असते. त्यात रात्रीच्या वेळेला येणाऱ्या अडचणीही मोठ्या असतात. रस्त्यावर असलेला अंधार अन् त्यात डोळ्यावर झोप यामुळे रोज शेकडो अपघात घडतात. फक्त रात्रीच नाही तर दिवसाही अशा घटना घडतात. मात्र या सर्व अडचणींवर नेमका उपाय काय? याचं उत्तर आपल्याला कुणालाच सापडणार नाही. मात्र गुजरातच्या एका बारावीत शिकणाऱ्या विद्यार्थ्यानं यावर भन्नाट उपाय शोधला आहे.

डुलकीमुळे होणारे अपघात टाळता यावेत यासाठी सूरतमध्ये राहणाऱ्या नवाब सुफियान शेखने एक चष्मा बनवला आहे. मागच्या काही काळात त्याच्या जवळच्या लोकांचा रस्ते अपघातात मृत्यू झाला होता. त्यावर उपाय म्हणून त्याने हा चष्मा तयार केला. डुलकीमुळे होणारे अपघात टाळता आल्यास अनेकांचे जीव वाचतील असा विचार आला आणि त्याने हा चष्मा तयार केला. हा चष्मा बनवण्यासाठी त्याला हजार रुपयांपेक्षाही कमी खर्च आला.

कसा आहे हा चष्मा?

नवाब सुफियान शेखने (Nawab Sufiyan Shaikh) तयार केलेला हा चष्मा म्हणजे एक भन्नाट गॅजेट आहे. या चष्म्यामध्ये त्याने एक सेन्सर फीट केलेलं आहे. हे सेन्सर सतत तुमच्या डोळ्यांकडे लक्ष देऊन असतं. त्यामुळे तुमचा डोळा लागला की लगेच हे सेन्सर वाजू लागतं. फक्त तुम्हीच नाही तर तुमच्या बाजूला बसलेली व्यक्ती देखील त्यामुळे अलर्ट होते. या सेन्सरसाठी लागणारी बॅटरी त्यानं चष्म्याच्या दुसऱ्या बाजूला बसवली आहे. एकुणच हा चष्मा किती फायदेशीर ठरतो, त्याचा वापर होऊ शकेल का, हे पाहावं लागणार आहे. मात्र त्याने केलेल्या या कामाचं सध्या मोठ्या प्रमाणात कौतुक होतंय.