नवी दिल्ली - गेल्या 24 तासात देशात 30 हजार 941 नवीन रुग्ण आढळले आहेत. सध्या देशात सक्रीय रुग्णांची संख्या 3 लाख 70 हजार 640 इतकी आहे. तर रिकव्हरी रेट हा 97.53 टक्के इतका आहे. सोमवारी दिवसभरात देशात कोरोनामुळे 350 जणांचा मृत्यू झाला. केरळमध्ये अद्याप कोरोना रुग्णांची संख्या कमी झालेली नाही. काल दिवसभरात केरळमध्ये 19 हजार 622 नवे रुग्ण सापडले असून 132 जणांचा मृत्यू झाला आहे.

भारतात काल दिवसभरात 36 हजार 275 रुग्ण कोरोनामुक्त झाले आहेत. आतापर्यंत देशात 3 कोटी 19 लाख 59 हजार 680 जणांनी कोरोनावर मात केली आहे. सध्या देशात आठवड्याचा पॉझिटिव्हीटी रेट हा 2.1 टक्के आहे. गेल्या दोन महिन्यांपासून हा रेट 3 टक्क्यांपेक्षा कमी आहे. तर दैनंदिन पॉझिटिव्हीटी रेट हा 2.22 टक्के इतका आहे.

महाराष्ट्रात नव्या रुग्णसंख्येत थोडी घट झाली आहे. सोमवारी दिवसभरात 3,741 नवीन रुग्णांची नोंद झाली. आतापर्यंत एकूण कोरोना रुग्णांची संख्या 64,60,680 झाली आहे. राज्यात अॅक्टिव्ह रुग्णांची संख्या काहीशी वाढून 51,834 इतकी झाली. तर आज दिवसभरात बरे होणाऱ्यांची संख्या वाढली असून आज 4,696 रुग्ण बरे होऊन घरी गेले. कोरोनातून बरे होणाऱ्या रुग्णांची संख्या 62,68,112 इतकी आहे. राज्यातील रुग्ण बरे होण्याचे प्रमाण वाढून 97.2 टक्के एवढं झालं आहे.