बेळगाव : हुबळी येथील विमानतळ (Hubli Airport) क्रांतिवीर संगोळी रायण्णा (Sangolli Rayanna) आणि बेळगाव येथील विमानतळाला वीरराणी कित्तूर चन्नम्मा (Kittur Rani Chennamma) यांचे नाव देण्याची मागणी के. एच. कोनरेड्डी यांनी विधानसभेत केली.

आमदार कोनरेड्डी यांनी संगोळी रायण्णा आणि कित्तूर चन्नम्मा यांनी देशासाठी अतुलनीय योगदान दिले आहे. यामुळे त्यांचे नाव हुबळी आणि बेळगाव येथील विमानतळांना मिळावे, अशी सभागृहातील आमदारांची अपेक्षा आहे. शिवाय यासंदर्भात अनेकदा विविध व्यासपीठावरून चर्चाही झाल्या आहेत. त्यासाठी राज्य सरकारने या संदर्भातील प्रस्ताव आणून मंजुरी द्यावी, अशी मागणी केली.

अरविंद बेल्लद यांनी बंगळूर विमानतळाला केम्पेगौडा यांचे नाव देण्यात यावे, अथवा आमच्या प्रादेशिक नेत्याचे नाव द्यावे, हुबळी विमानतळाला संगोळ्ळी रायण्णा यांचे नाव द्यावे आणि बेळगाव विमानतळाला कित्तूर राणी चन्नम्मा यांचे नाव द्यावे, अशी मागणी केली. प्रश्नांना उत्तरे देताना कायदा मंत्री एच.के. पाटील यांनी राज्यातील विविध विमानतळांना नावे देण्याबाबत मुख्यमंत्री आणि इतर सहकाऱ्यांशी चर्चा करून यासंदर्भात निर्णय घेण्यात येईल, अशी माहिती दिली.