नवी दिल्ली- उत्तर प्रदेशातील डासना देवी मंदिराच्या पुजाऱ्याने धक्कादायक वक्तव्य केलंय. नरसिंहानंद सरस्वती यांनी देशाचे माजी राष्ट्रपती डॉ. ए.पी.जे. अब्दुल कलाम यांच्याविषयी वादग्रस्त वक्तव्य केलंय. देशातील सन्माननीय कुटुंबातील कोणताही मुस्लिम हा कधीच देशभक्त असू शकत नाही, असं त्यांनी म्हटलं आहे. तसेच नरसिंहानंद यांनी कलाम यांना जिहादी ठरवून टाकलंय. उत्तर प्रदेशातील गाझियाबादमधील डासना देवी मंदिराचे नरसिंहानंद सरस्वती पुजारी आहेत. त्यांच्या या वक्तव्यामुळे वाद निर्माण होण्याची शक्यता आहे. अनेकांनी त्यांच्या वक्तव्याचा निषेध केला आहे. पीटीआयने यासंदर्भातील वृत्त दिलंय.

अब्दुल कलाम हे डीआरडीओ प्रमुख होते, त्याचवेळी त्यांनी पाकिस्तानला अणुबॉम्ब निर्मितीसंदर्भातील माहिती दिल्याचा धक्कादायक आरोप पुजाऱ्याने केला आहे. कलाम यांनी मुस्लिमांसाठी एक विशेष विभाग तयार केला होता. राष्ट्रपती भवनमध्ये हा विशेष विभाग होता. याठिकाणी कोणताही मुस्लिम व्यक्ती आपली तक्रार घेऊन जाऊ शकत होता, असा दावाही नरसिंहानंद सरस्वती यांनी केलाय. नरसिंहानंद यांनी कोणताही पुरावा न देताच असा धक्कादायक आरोप केला आहे. 

परमबीर सिंह यांच्या याचिकेवर सुनावणी करण्यास सर्वोच्च न्यायालयाच नकार

भारतीयांसाठी अब्दुल कलाम हे एक प्रिय राष्ट्रपती होते. त्यांनी देशाच्या विकासासाठी महत्त्वाचे योगदान दिले आहे. अणु चाचणीसंदर्भात अब्दुल कलाम यांची भूमिका महत्त्वाची होती. कलाम लहान मुलांमध्येही प्रचंड लोकप्रिय होते. त्यांनी दिलेली भाषणं ऐकून अनेकांना प्रेरणा मिळते. त्यांच्या कार्यासाठी त्यांना सरकारने भारतरत्न देऊन गौरव केला आहे. कलामांनी आपल्या बोलण्यातून अनेकदा भारताबाबत प्रेम व्यक्त केले आहे. अशा आदरणीय व्यक्तीबद्दल नरसिंहानंद सरस्वती या पुजाऱ्याने वादग्रस्त वक्तव्य केलंय.

NIA vs ATS; पाहा कोण आहे पॉवरफुल?

गाझियाबादमध्ये काही दिवसांपूर्वी मंदिरात जाऊन पाणी प्यायल्याने एका मुस्लिम मुलाला बेदम मारहाण करण्यात आली होती.  नरसिंहानंद सरस्वती याच मंदिराचे पुजारी आहेत. त्यामुळे गाझीयाबादमधील हे मंदिर पुन्हा एकदा चर्चेत आले आहे. माजी राष्ट्रपती कलाम यांना मिसाईल मॅन म्हणून ओळखलं जातं. त्यांना साधेपणा अनेकांना भावला. डासना देवी मंदिराच्या पुजाऱ्याने कोणतेही पुरावे सादर न करता त्यांच्यावर धक्कादायक आरोप केल्याने वाद निर्माण होण्याची शक्यता आहे.