फिलिपाइन्सची राजधानी मनिला (Philippines Manila) इथं पंजाबच्या कबड्डी प्रशिक्षकाची (Punjab Kabaddi Coach) गोळ्या घालून हत्या करण्यात आलीये.

मनिला इथं गुरप्रीत सिंग गिंद्रू (वय 43) यांची गोळ्या झाडून हत्या झाल्याची बातमी कुटुंबापर्यंत पोहोचल्यानंतर, मोगा जिल्ह्यातील पाखरवाड गावात शोककळा पसरलीये. गुरप्रीत यांचा मृतदेह सरकारनं घरी आणावा, अशी मागणी ग्रामस्थांनी केली आहे. जेणेकरुन आम्ही त्यांच्यावर कायद्यानुसार अंत्यसंस्कार करू, असं गावकऱ्यांचं म्हणणं आहे.

सूत्रांकडून मिळालेल्या माहितीनुसार, अज्ञात हल्लेखोरांनी घरात घुसून गुरप्रीतच्या डोक्यात गोळी झाडली. गावकऱ्यांनी सांगितलं की, गुरप्रीत (Gurpreet Singh Gindru) काही वर्षांपूर्वी कॅनडाला गेला होता, तर त्याची पत्नी आणि मुलगा फिलिपाइन्समध्ये राहत होते. काही वर्षांसाठी तोही फिलीपिन्सला आला होता. त्याचे आई-वडील आणि भाऊ मोगा गावात परतले आहेत.