Republic Day Air Show : देशाच्या प्रजासत्ताक दिन सोहळ्याला अवघे काही तासच शिल्लक आहेत. या सोहळ्याची तयारी जवळपास पूर्ण झाली आहे. यावर्षी प्रमुख पाहुणे म्हणून फ्रान्सचे राष्ट्रपती इमॅन्युएल मॅक्रॉन हे या सोहळ्याला उपस्थित असतील. त्यांच्यासमोर प्रजासत्ताक दिन सोहळ्यातील इतर कार्यक्रमांसोबतच भारतीय हवाई दलाचं थरारक प्रात्यक्षिक देखील सादर होणार आहे.

प्रजासत्ताक दिनाच्या परेडमध्ये वायुसेनेच्या मार्चिंग दलाचं नेतृत्व करण्याची जबाबदारी महिला अधिकाऱ्यांकडे आहे. स्क्वॉड्रन लीडर रश्मी ठाकूर, सुमिता यादव, प्रतीति अलहुवालिया आणि फ्लाईट लेफ्टनंट कीर्ती रोहिल या मार्चिंग दलाचे नेतृत्त्व करतील. या ग्रुपमध्ये 144 हवाई योद्धे सहभागी होतील.

कोणत्या विमानांचा समावेश?

या सोहळ्याला हवाई दलाची 51 विमानं प्रात्यक्षिक करणार आहेत. यामध्ये 29 लढाऊ विमानं, आठ मालवाहू विमानं, 13 हेलिकॉप्टर आणि एक वारसा विमान सहभागी असणार आहेत. यात सुखोई-30, जॅग्वार, सी-130 आणि तेजस या विमानांचा सहभाग असेल. यावेळी विविध प्रकारची चित्तथरारक प्रात्यक्षिके दाखवण्यात येतील.

मॅक्रॉन यांचा दोन दिवसीय दौरा

पीटीआय वृत्तसंस्थेने दिलेल्या माहितीनुसार, मॅक्रॉन हे आज (25 जानेवारी) दुपारीच भारतात दाखल होतील. 2.30 वाजेच्या सुमारास ते जयपूर एअरपोर्टवर उतरतील. त्यानंतर ते जयपूरमध्येच थांबणार आहेत. सायंकाळी 5:30 वाजता पंतप्रधान मोदी त्यांचं औपचारिक स्वागत करतील. सायंकाळी सात वाजेच्या सुमारास दोन्ही नेत्यांमध्ये द्विपक्षीय चर्चा होईल. रात्री 8.50 च्या सुमारास ते दिल्लीला रवाना होतील. 26 जानेवारीच्या प्रजासत्ताक दिन परेडनंतर ते फ्रान्सला परतणार आहेत.