Robert Vadra Smriti Irani: रॉबर्ट वाड्रा यांनी केंद्रीय मंत्री स्मृती इराणी यांनी लोकसभेत त्यांचा फोटो दाखवल्याबद्दल त्यांच्यावर जोरदार प्रहार केला आहे. पीटीआयशी बोलताना वाड्रा म्हणाले, मणिपूर जळत आहे. महिलांचे व्हिडीओ येत आहेत आणि या मंत्री (स्मृती इराणी) या घटनांवर बोलण्याऐवजी माझ्याबद्दल बोलत आहेत.

वाड्रा पुढे म्हणाले की, मी स्वतःला संसदेपासून दूर ठेवतो. मी राजकारणाशी संबंधित कोणत्याही गोष्टीवर तेव्हाच बोलतो जेव्हा सरकार माझे नाव घेते आणि मी हा लढा सुरूच ठेवणार आहे.

अविश्वास प्रस्तावावरील राहुल गांधींच्या वक्तव्यावर स्मृती इराणी यांनी जोरदार प्रहार केला होता. यावेळी त्यांनी रॉबर्ट वाड्रा आणि गौतम अदानी यांचे फोटो दाखवून राहुल गांधींसह काँग्रेसवर निशाणा साधला.

फोटो दाखवत स्मृती इराणी म्हणाल्या की, "काँग्रेस अदानी अदानी करत आहेत, थोडं आता मलाही बोलायचं आहे. माझ्याकडेही फोटो आहेत. जर अदानी एवढे वाईट असतील तर रॉबर्ट वाड्रा त्यांच्या सोबत काय करत आहेत?"

याला उत्तर देताना वाड्रा यांनी फेसबुक पोस्टमध्ये लिहिले होते की, "स्मृती इराणी जी, संसदेत माझ्या नावाचा गैरवापर करणे थांबवा. मी तुम्हाला आव्हान देतो, पुरावे सादर करा किंवा तुम्ही खोटे बोलणे थांबवा.

माझ्याकडे बोटे दाखवून तुमचे कारनामे लपून राहणार नाहीत. तुमच्या आणि तुमच्या कुटुंबाशी संबंधित अनेक वाद आहेत. देशाला तुमच्या गोव्यातील रेस्टॉरंट्सबद्दल जाणून घ्यायचे आहे"

रॉबर्ट वाड्रा इथेच थांबले नाहीत ते पुढे म्हणाले की, "तुमची पदवी आणि शैक्षणिक पात्रता देखील वादात आहे. आधी तुम्ही त्याचे स्पष्टीकरण द्या आणि मग इतरांकडे बोट दाखवा... तुम्ही खरोखर पात्र आहात का, गोवा आणि इतर विषयांवर तुम्ही उत्तर द्याल की नाही याची मी वाट पाहत आहे''