चंदीगड : पंजाबी गायक आणि काँग्रेस नेते सिध्दू मुसेवाला यांच्या हत्येप्रकरणी (Sidhu Moose Wala Murder Case) अटक करण्यात आलेला आरोपी पोलिसांच्या ताब्यातून फरार झाल्याचं वृत्त आहे. सिध्दू मुसेवालाला गोळ्या घालणारा गँगस्टर लॉरेन्स बिश्नोई (Lawrence Bishnoi) टोळीचा शूटर पंजाब पोलिसांच्या (Punjab Police) ताब्यातून फरार झाल्याचं सांगण्यात येत आहे. यामुळं पंजाब पोलिसांमध्ये खळबळ उडाली आहे.

पोलिसांनी संपूर्ण परिसराची नाकाबंदी केली असून शोध मोहीम सुरू आहे. गँगस्टर लॉरेन्स बिश्नोईचा शूटर दीपक टिनू (Deepak Tinu) हा सीआयए पोलिसांच्या ताब्यातून पळून गेल्याचं सांगण्यात येत आहे. मिळालेल्या माहितीनुसार, मानसा सीआयए स्टाफची टीम त्याला कपूरथला जेलमधून रिमांडवर आणत होती. यावेळी पोलिसांच्या पथकाला चकमा देऊन तो पळून गेल्याचं सांगितलं जात आहे.

एएनआय वृत्तानुसार, मानसा पोलिसांनी (Mansa Police) दीपक टिनू फरार झाल्याची पुष्टी केलीय. मानसा पोलिसांनी सांगितलं की, 'आज सकाळी दीपक टिनूला सीआयए कर्मचार्‍यांच्या पथकाद्वारे कपूरथला कारागृहातून एका खासगी वाहनातून रिमांडवर मानसा इथं आणलं जात होतं. यावेळी दीपक टिनू फरार झाला. सिध्दू मूसेवाला खून प्रकरणाशी त्याचा संबंध तपासला जात आहे.'

मुसेवाला हत्येबाबत त्याची लॉरेन्स बिश्नोईशी चर्चा झाल्याचं सांगण्यात येतं आहे. या दोघांनी 27 मे रोजी कॉन्फरन्स कॉलद्वारे बोलून 29 मे रोजी मुसेवाला यांची हत्या केली. मुसेवाला यांच्यावर गोळ्या झाडणाऱ्यांमध्ये दीपक टिनूचाही समावेश असल्याचं सांगण्यात येत आहे. सिध्दू मुसेवाला हत्येप्रकरणी आतापर्यंत 18 आरोपींना अटक करण्यात आली असून, चकमकीत दोघांचा मृत्यू झाला आहे.