मुंबई : राष्ट्रगीताचा (National Anthem disrespect) अवमान केल्याप्रकरणी पश्चिम बंगालच्या मुख्यमंत्री ममता बॅनर्जी (Mamata Banerjee) यांना माझगाव दंडाधिकारी न्यायालयाने समन्स (Mazgaon court summons) बजावले. येत्या दोन मार्च रोजी त्यांना न्यायालयात हजर राहण्याचे आदेश आज देण्यात आले. गतवर्षी डिसेंबरमध्ये मुंबईत (Mumbai) आयोजित केलेल्या कार्यक्रमात बॅनर्जी हजर होत्या. यावेळी राष्ट्रगीत सुरू असताना दोन ओळी म्हटल्यावर त्या अचानक थांबल्या आणि कार्यक्रमातून निघून गेल्या.

याबाबत भाजप कार्यकर्ते विवेकानंद गुप्ता यांनी दंडाधिकारी न्यायालयात फौजदारी तक्रार दाखल केली होती. ममता यांच्यावर फौजदारी गुन्हा दाखल करावा, अशी मागणी त्यांनी केली. याबाबत दाखल केलेल्या ध्वनिचित्रफीत, यू-ट्युब लिंक, डीव्हीडी आदी पुराव्यांवरून ममता यांनी राष्ट्रीय सन्मान कायद्याच्या कलम ३ नुसार गुन्हा केला आहे, असे निरीक्षण न्यायालयाने नोंदविले आहे.

ममता बॅनर्जी मुख्यमंत्री असल्या तरी त्यांच्यावर कारवाई करण्यासाठी कायदेशीर संमतीची आवश्यकता नाही. त्यामुळे कारवाई बाबतीत कोणतीही अडचण नाही, असे मत न्यायालयाने व्यक्त केले आणि येत्या दोन मार्चला हजर राहण्याचे आदेश न्यायालयाने दिले.