बिहारमधील बेगुसराय येथे 25 वर्षीय विवाहित मुलगी, तिचे वडील आणि भावाची गोळ्या घालून हत्या करण्यात आली. विवाहितेच्या सासरच्या मंडळींनी ही हत्या केली आहे. या घटनेनंतर संपूर्ण परिसरात खळबळ उडाली. माहिती मिळताच पोलिसांनी घटनास्थळ गाठून तपास सुरू केला. हे जबरदस्तीचे लग्नाचे प्रकरण असल्याचे गावप्रमुखांनी सांगितलं. या कारणामुळे विवाहितेच्या सासरचे लोक तिला घरी ठेवत नव्हते.

ही घटना साहेबपूर कमल पोलीस ठाण्याच्या हद्दीतील विष्णुपूर आहुक गावात घडली. २५ वर्षीय नीलू कुमारी, नीलूचे वडील उमेश यादव आणि भाऊ राजेश यादव अशी मृतांची नावे आहेत. हे लोक बेगुसराय जिल्ह्यातील श्रीनगर भागातील रहिवासी होते.

या घटनेबाबत साहेबपूर कमल पोलिस स्टेशनचे एसएचओ दीपक कुमार यांनी सांगितले की, ही घटना शनिवारी संध्याकाळी घडली. उमेश यादव मुलगा आणि मुलगी नीलूसह नीलूच्या सासरच्या घरी गेला होता. उमेश जेव्हा मुलीच्या सासरच्या घरी पोहोचला तेव्हा सासरचे लोक संतापले आणि बाचाबाची झाली, असे गावकरी सांगतात.

दरम्यान, नीलू कुमारी यांच्या सासऱ्यांनी आपली बंदूक काढून तिघांनाही जवळून गोळ्या घातल्या, यात तिघांचा जागीच मृत्यू झाला. घटनेनंतर आरोपींनी घटनास्थळावरून पळ काढला. माहिती मिळताच पोलिसांनी घटनास्थळी पोहोचून माहिती घेतली. पोलिसांनी मृतदेह ताब्यात घेऊन तपास सुरू केला आहे. पोलिसांनी आरोपींना पकडण्यासाठी शोधमोहीम सुरू केली आहे. वरिष्ठ पोलीस अधिकारी घटनास्थळी दाखल झाले आहेत. या प्रकरणाची चौकशी करण्यात येत आहे.

गावप्रमुख सुबोध कुमार यादव यांनी सांगितले की, हे जबरदस्ती विवाहाचे प्रकरण आहे, ज्यामध्ये मुलांचे अपहरण करून त्यांच्या इच्छेविरुद्ध लग्न केले जाते. यामुळेच लग्नाला दोन वर्षे उलटूनही नीलू कुमारीचे सासरचे लोक तिला त्यांच्या घरी घेऊन जात नव्हते.