इटावा : काही दिवसांपूर्वी इटावा येथे वैद्यकीय महाविद्यालयाचे उद्घाटन पंतप्रधान नरेंद्र मोदी (Narendra Modi) यांच्या हस्ते झाले. पंतप्रधानांच्या नेतृत्वाखाली आपण यशस्वी रित्या कोरोनाच्या विषाणूशी लढा दिला, असे उत्तर प्रदेशचे मुख्यमंत्री योगी आदित्यनाथ म्हणाले. राज्यात कोविडचा संसर्ग झाला तेव्हा काँग्रेस पक्ष, बहुजन समाज पक्ष आणि समाजवाद पक्ष कुठे होते?, असा सवाल योगी यांनी विचारला. जर आपण बूथस्तरावर भाजपची ताकद वाढवली, तर पक्ष ३२५ विधानसभेच्या जागांपेक्षा अधिक जागा जिंकेल, असे उत्तर प्रदेशचे मुख्यमंत्री योगी आदित्यनाथ (CM Yogi Adityanath) यांनी भाजप (BJP) बूथ अध्यक्षांना संबोधिताना म्हणाले.

आगामी उत्तर प्रदेश विधानसभा निवडणुकांमुळे राज्यात राजकीय रणधुमाळी सुरु झाली आहे. पंतप्रधान नरेंद्र मोदींचे लाल टोपीमुळे राज्याला धोका, समाजवादी पक्षाचे अध्यक्ष अखिलेश यादव यांचे मोहम्मद जीनांविषयी केलेले विधान यामुळे सगळीकडे चर्चेला उधाण आले होते. आताही राजकीय नेते स्फोटक विधाने करण्यास मागे पुढे पाहत नसल्याचे दिसत आहे.