Top Companies For Job In India : शिक्षण पूर्ण झाल्यानंतर आपल्यापैकी अनेकांना चांगल्या कंपनीत नोकरी मिळावी असे स्वप्न असते, यासाठी अनेक जण प्रयत्नदेखील करत असतात. काहींना यामध्ये यश मिळते तर, काहींचा हिरमोड होतो. मात्र, भारतात नोकरीसाठी सर्वाधिक लोकांना आकर्षित करणाऱ्या कंपन्यांमध्ये मायक्रोसॉफ्ट कंपनी आघाडीवर असल्याचे दिसून आले आहे. तर, मर्सिडीज-बेंझ दुसऱ्या आणि अॅमेझॉन इंडिया तिसऱ्या स्थानावर आहे. टॉप 10 कंपन्यांच्या यादीमध्ये 5 कंपन्या या देशांतर्गत आहेत. रँडस्टॅड एम्प्लॉयर ब्रँड रिसर्चने (REBR) 2022 जारी केलेल्या अहवालातून ही बाब समोर आली आहे.

REBR ने जारी केलेल्या अहवालानुसार, टॉप 10 मध्ये टाटा समूहाच्या तीन कंपन्या असून, यामध्ये टाटा कन्सल्टन्सी सर्व्हिसेस (TCS) सातव्या, टाटा स्टील आठव्या आणि टाटा पॉवर नवव्या स्थानावर आहे. तर, सॅमसंग दहाव्या क्रमांकावर आहे. या कंपन्यांची आर्थिक स्थिती, प्रतिष्ठा आणि आकर्षक पगार आणि इतर सुविधांनुसार निवड करण्यात आली आहे.

24 टक्के कर्मचाऱ्यांनी बदलल्या नोकऱ्या

सर्वेक्षणानुसार, 2021 च्या शेवटच्या सहामाहीत भारतातील सुमारे 24 टक्के कर्मचाऱ्यांनी नोकरी बदलल्याचे नमुद करण्यात आले आहे. जानेवारी ते मार्च या कालावधीत सर्वेक्षण केलेल्या तीनपैकी एका कर्मचाऱ्याने (37 टक्के) सांगितले की, त्यांना 2022 च्या पहिल्या सहामाहीत नोकऱ्या बदलायच्या आहेत.