नाशिक : कोरोना महामारीच्‍या दुसऱ्या लाटेमुळे यंदा दहावी, बारावीच्‍या लेखी परीक्षा होऊ न शकल्‍याने मूल्‍यांकनाच्‍या आधारे निकाल जाहीर केला होता. तरीदेखील काही विद्यार्थी या मूल्‍यांकन पद्धतीनुसार अनुत्तीर्ण ठरविले गेले. अशा विद्यार्थ्यांची मात्र आता पुरवणी परीक्षा घेतली जाणार आहे. शिक्षण मंडळातर्फे संभाव्य तारखा जाहीर केल्‍या असून, सप्‍टेंबर-ऑक्‍टोबर महिन्‍यात या परीक्षा घेण्याचे नियोजित आहे.

लेखी परीक्षेअभावी मूल्‍यमापन पद्धतीनुसार बहुतांश विद्यार्थी उत्तीर्ण झाले होते. यामुळे यंदाच्‍या वर्षाचा निकाल उच्चांकी लागला होता. असे असतांना एक टक्‍यांहून कमी विद्यार्थी मात्र मूल्‍यमापन पद्धतीनंतरही उत्तीर्ण होऊ शकले नव्‍हते. या विद्यार्थ्यांना आता उत्तीर्ण होण्यासाठी परीक्षेचा सामना करावा लागणार आहे. नियमित परीक्षेत अनुत्तीर्ण विद्यार्थ्यांना संधी मिळावी, याकरीता नियमित शैक्षणिक वर्षात जुलै-ऑगस्‍टमध्ये परीक्षा घेतली जात असते. परंतु यंदा निकालात विलंब झाल्‍यानंतर नुकताच शिक्षण मंडळाने पुरवणी परीक्षेच्‍या तारखांची घोषणा केली आहे.

१५ सप्‍टेंबरपासून परीक्षा

लेखी परीक्षेपूर्वी दहावी, बारावीच्‍या प्रात्‍येक्षिक, श्रेणी, तोंडी परीक्षा पार पडणार आहेत. इयत्ता बारावीच्‍या परीक्षा १५ सप्‍टेंबर ते ४ ऑक्‍टोबर दरम्‍यान होतील तर दहावीच्या परीक्षा २१ सप्‍टेंबर ते ४ ऑक्‍टोबर दरम्‍यान घेतल्‍या जाणार आहेत.

लेखी परीक्षा १६ सप्‍टेंबरपासून

प्रात्‍येक्षिक परीक्षा झाल्‍यानंतर लगेचच लेखी परीक्षांना सुरवात होणार आहे. त्‍यानुसार बारावीची (सर्वसाधारण व द्विलक्षी विषय-जूना व पुनर्रचित अभ्यासक्रम) परीक्षा १६ सप्‍टेंबर ते ११ ऑक्‍टोबर दरम्‍यान होईल. तर बारावीची व्‍यवसाय अभ्यासक्रम (जूना व पुनर्रचित अभ्यासक्रम) परीक्षा १६ सप्‍टेंबर ते ८ ऑक्‍टोबर या कालावधीत पार पडणार आहे. दहावीची परीक्षा २२ सप्‍टेंबर ते ८ ऑक्‍टोबर या कालावधीत घेण्याचे नियोजित आहे.