इराण : इराण या इस्लामिक देशात (Islamic countries) हिजाबला (Hijab) कडाडून विरोध केला जात आहे. इराणी महिला हिजाबचा निषेध करीत रस्त्यावर उतरल्या आहेत. इतकच नाही तर सार्वजनिक ठिकाणी हिजाब काढतानाचा व्हिडिओही बनवत आहे. इराणच्या अधिकृत वृत्तसंस्थेनुसार, महिला हिजाब काढतानाचे व्हिडिओ पोस्ट करून इस्लामिक रिपब्लिकच्या कठोर हिजाब नियमांचा निषेध करीत आहेत.

इराणच्या कायद्यानुसार महिलांना सार्वजनिक ठिकाणी केस झाकणे (Hijab) बंधनकारक आहे. हिजाबबाबत सातत्याने निदर्शने होत असली तरी मंगळवारी देशभरात मोठ्या संख्येने इराणी महिलांनी हिजाबविरोधी मोहिमेत भाग घेतला. इराणच्या अधिकाऱ्यांनी १२ जुलै हा ‘हिजाब आणि शुद्धता दिवस’ म्हणून घोषित केला होता. याचा निषेध म्हणून महिला रस्त्यावर उतरल्या.

सोशल मीडियावर (Social Media) शेअर केलेल्या व्हिडिओंमध्ये महिलांव्यतिरिक्त पुरुषही इराणच्या कायद्याविरोधात निषेध करताना दिसत आहेत. काही व्हिडिओंमध्ये महिला रस्त्यावर स्कार्फ फेकताना दिसत आहेत. सार्वजनिक वाहतूक आणि दुकानांमध्ये महिला हिजाबशिवाय दिसत आहेत. इराणच्या सरकारने देशाच्या सुरक्षा दलांना हिजाब अनिवार्य करण्याच्या सक्त सूचना दिल्या आहेत. महिलांसाठी हिजाब अनिवार्य करण्यासाठी लष्कर प्रयत्न करीत आहे.

१९७९ च्या इस्लामिक क्रांतीनंतर हिजाब अनिवार्य

१२ जुलै रोजी देशात संभाव्य हिंसाचार होऊ शकतो. मोठ्या संख्येने लोकांना ताब्यात घेतले जाऊ शकते, असे न्यूयॉर्क स्थित इंटरनॅशनल कॅम्पेन फॉर ह्युमन राइट्स इन इराणने (ICHRI) ११ जुलै रोजी सांगितले होते. त्यानंतर एका वृत्तसंस्थेने सांगितले की, ११ जुलैलाच अनेकांना अटक केली होती. १९७९ च्या इस्लामिक क्रांतीनंतर इराणी महिला आणि ९ वर्षांपेक्षा जास्त वयाच्या मुलींना सार्वजनिक ठिकाणी हिजाब (Hijab) अनिवार्य केला आहे.